名星藝人同電視劇對青年人影響有幾大？睇吓香港律師會噚日公布嘅「青少年法律知多少」調查結果就知道。呢個調查選出一批曾經飾演過律師嘅藝人，畀啲十一至二十五歲嘅青少年揀一個做佢哋出庭代表律師。結果喺電視劇《男親女愛》中飾演MissMo嘅鄭裕玲眾望所歸勝出！
一千名受訪者中，有三成選擇MissMo，其次最多人揀嘅就係MissMo喺劇中嘅愛人，養咗隻「小強」做寵物嘅阿Lok黃子華，佔一成半選票。至於其他受訪者嘅選擇大概可以分為兩類，有啲擁護形象較為嚴肅嘅陳慧珊同李克勤，亦有啲鍾意搞笑胡鬧嘅周星馳、吳君如、張達明同葛文輝等。
鄭裕玲同八方講，自己受年輕人歡迎，主要因為佢有話直說、唔講大話，佢重話有時間嘅話都想試吓做真正律師嘅滋味。
八方覺得，套電視劇早排播映時咁受歡迎，MissMo同做師爺嘅阿Lok雙雙跑出一啲都唔奇。不過，諗番現實一面，咁多人揀神神化化、成日貼錯門神嘅MissMo同阿Lok做佢哋嘅出庭代表律師，打官司好似玩玩吓咁，輸咗點算？
（圖）鄭裕玲：嘿！我MissMo唔係浪得虛名㗎！
黃子華：多謝大家支持！（設計對白）
傳真︰2623-9278
電郵︰