黎智英在台灣同業眼中，原來係極具殺傷力而又神秘嘅過江龍！話說八方前幾日應邀到台灣公幹，見到一班傳媒業殿堂級人馬；走訪咗幾間大出版社，每到一個地方，八方都成為焦點，猛俾人追問台灣《蘋果》究竟係咪會請幾百個記者、Jimmy黎究竟係咪成日鬧人、兩地《蘋果日報》係咪會一樣、狗仔隊係點……搞到八方好似有啲喧賓奪主咁。
咁呢班寶島同行點睇Jimmy同佢台灣嘅生意呢？呢班身居要職嘅前輩認為，《壹週刊》某程度上成功咗，佢哋亦好欣賞當中某啲新聞嘅處理手法。至於台灣《蘋果》，佢哋認為𠵱家係寶島嘅三大主流報：《聯合報》、《自由時報》、《中國時報》最弱嘅時候，加上當地從未有過一份類似《蘋果》嘅報紙，揀呢個時間進場，應該大有可為。佢哋又覺得香港《蘋果》好outstanding，市場都好期待台灣有份咁嘅報紙。真係聽到有啲飄飄然。
不過台灣基層啲同業（即係編輯、記者等等）就有另外看法，佢哋好擔心《蘋果》勁過頭而導致飯碗不保，對Jimmy又愛又恨！
傳真︰2623-9278
電郵︰