西九龍區嚟緊幾年有大把新盤應市，中原地產九龍區揸fit人一姐（劉瑛琳）就索性將大本營搬去尖沙嘴港威大廈，實行近水樓臺！
劉一姐話個單位喺第二座，面積二千六呎，下月會正式搬過去，個九龍區總部會有二十人，除咗佢之外，都係文職人員。今次忽然換總部，主要係要地方闢培訓室，畀西九龍同新九龍組同事。
新總部重由九龍站望到奧運站，即係日後搵食嘅地方，蘭西心諗，啲代理日對夜對，熟晒呢一帶嘅環境，第日sell客就易如反掌，果然好橋。而租九倉嘅寫字樓，同九倉關係又會好啲，可能做擎天半島二期時有優勢都未定，一舉數得。
一姐坐開嘅界限街大本營，由九龍豪宅部營業董事李子明坐鎮。
下個禮拜係萬聖節，嘉里建設管理嘅半山豪宅乘機搞活動，同住戶聯絡感情。佢哋重事先了解，有邊啲住客願意參與，到時由管理公司職員帶隊同小住戶去拍門攞糖食。細路開心之餘，又唔會騷擾到啲唔想參加嘅住客，認真細心。𠵱家要做好物業管理真係唔易㗎。
細地產代理行因大行爭生意同二手成交萎縮影響，惟有靠結盟增強實力，以加盟商形式經營嘅世紀21就食正條水，啱啱又獲上水龍深地產加盟。龍深地產喺00年10月成立，主要係做上水同粉嶺區嘅舖位同住宅買賣。
今年加盟世紀21嘅代理行有馬鞍山地膽奇豐物業，同黃大仙地膽嘅富山地產。睇嚟世紀21嘅實力都不容忽視。
華置行老闆古劍輝噚日同達安企業班老總簽約，代理推銷上海達安花園，唔通佢對香港樓市失望轉投上海懷抱？
古劍輝話公司一向主張多元化發展，上海樓市咁旺，邊個唔想分杯羹。佢哋喺六月正式進駐上海，重成功拉攏美聯中國部舊將李梓敬過檔，睇實上海四間分行。𠵱家主力搵發展商合作，手頭上代理嘅盤包括三個住宅盤，同兩個寫字樓。嚟緊重有上海富商周正毅嘅虹橋東方倫敦豪宅，下個月會喺香港賣。
利嘉閣地產董事廖偉強上任冇耐，已經滿肚大計，佢對蘭西講除招攬到港置助董胡栢榮之外，重搵到另一猛將加盟，詳情好快公布。
廖偉強重話，會積極攞多啲代理同招標做，好似恒安發展嘅一籃子村屋，只係得兩家特約代理，利記係其中一間。數量最多嘅係太和火車站附近嘅松苑，百四幢四百二十伙，意向呎價兩千蚊。同區太湖山莊二期，五幢十五伙，呎價兩千一蚊。而元朗華安苑有約百五伙，呎價千七蚊；同區雅妍花苑就有三十六個單位。
另外，又攞到王氏電子九龍塘劍橋道11B號兩幢半獨立屋，負責招標，若成功賣出，既省到招牌，佣金收入又和味。
新地提前開賣將軍澳中心，雖然成績一般，仍繼續宣傳，將於周末舉行「0距離攞獎」喜哄派對，詳情今日揭盅。新地重請嚟電視節目主持人鄭丹瑞出席記者會。
新地代理總經理周國賢日前見到蘭西，透露將軍澳中心周末會有嘢搞，但強調唔係優惠促銷，目的只想大家開開心心玩一餐。
蘭西
電郵地址：