記得好多個月前，小初曾經提過市場盛傳賣皮革嘅大華國際（600）可能賣盤，其間重傳出已經賣成，但最新版本又話唔係，仍在四出兜售。小初就呢個疑團打電話畀年輕賓架，八卦一番。
年輕賓架話，今年5、6月間，市場確係傳聞大檸檬睇中大華，重使出佢嘅拿手好戲，即表面上財政支持某人創業，但實情係搵個人出面買殼，聽聞當時已經傾到七七八八。
不過，唔知係咪7月份細價股風雲，抑或係同肥仔嗰場恩怨情仇累事，總之單嘢就不了了之，所以近期又見大華重提賣盤。
今次嘅情況同上次有少少唔同，因為係大華嘅隱形第二大股東出面同人傾價，重搞到好似賣樓盤咁，要提價加推。由於第二大股東份量甚重，買家不能當佢冇到，一次過搞掂晒所有貨源，總好過買完隻殼，先至執漏。
慕容小初