標準普爾將本港貨幣長期評級展望由穩定轉為負面，主要因為見唔到特區政府有何良方解決龐大財赤。阿松到現時仍話有信心在2006至2007年前達致收支平衡，至於有何具體方法，則仍在諮詢市場。這反映政府在解決財赤方面仍議而不決，重係用緊拖字訣，諗住拖到2003至2004年經濟復甦就一天光晒，唔使推出令人反感的財政措施。若阿松係咁諗，就真係大錯特錯。
香港經濟動力，無論是金融或是地產，主要都是依靠外資流入，但外資眼見港府對財赤苦無對策，重邊有信心將資金在香港進行投資，想拖到2003至2004年等經濟復甦，簡直是妄想。莫講話外資唔敢流入香港，恐怕連港資亦可能要流出。阿虎有唔少朋友已逐步將資產分批轉為美元，以避脫鈎風險。阿松此時若不大刀闊斧，恐怕會為時已晚。
不過，港股噚日影響輕微，全日只跌17點，收報9787，成交額縮至52.55億元。黑客話，即月期指以好倉為主，加上外資大行要為中電信（728）招股造勢，港股短期都會向好，大戶遲啲至會搵美電抽高做藉口造淡。
品質國際（243）噚日停牌，市場傳公司先舊後新配售2950萬股，每股配售價1.50元，集資4425萬元。據聞品質集資額原先係數以億元計，因此今次配完股後，可能幾個月後又再配股。
渣打（2888）噚日截止認購，據聞認購反應麻麻，配售股份之作價較市價折讓只有2%，毫無吸引力，能夠獲得足額認購已算不俗。
阿虎