呢幾年時勢唔好，示威請願變家常便飯，壓力團體同政黨要引起公眾注意真係好難。
八方聽聞前排民生聯盟坐埋一齊，想諗啲計引起公眾及政府關注低下階層苦況，但係佢哋又唔係好似法師咁有座廟，有乜唔高興就封山封廟，邊有人得閒理佢哋吖！
諗諗吓，有人忽發奇想，不如盡地一煲，重演低下階層慘況，有建議叫李永達去食二手飯、李卓人去輪米、何喜華去偷飯盒，咁就夠晒激，一定有傳媒報道，重有人話達仔最好食劉慧卿二手飯，點解？因為食完可能可以變得好似卿姐咁惡！
雖然只係「吹水」性質，但都有人話唔好，因為好似拎人哋嘅不幸做宣傳。但正如有民生聯盟成員同八方講，市民已經俾排山倒海嘅壞消息搞到麻木晒，政府又睬你都儍，唔係咁真係冇乜好計。
傳真︰2623-9278
電郵︰