數碼影音：
連擊水貨富士動畫王行貨搶先曝光

自從xD卡喺十月面世後，富士在短時間內已推出四部對應新機，喺年尾重會陸續有新型號登場，加埋拍住搵食嘅OLYMPUS，令市面上一下子湧現多款xD卡新機。富士最新搞作係大賣高質素動畫拍攝功能嘅FinePixM603，日本要11月10日先正式發售，估唔到香港行貨今次反應迅速，率先喺昨日舉行發布會，比日本更早曝光。
記者：徐影龍
攝影：伍慶泉
ImageGirl：小蕙

動畫質素直逼DV
睇得出富士今次將FinePixM603定位喺中級嘅xD卡機，因為終於將第三代六百萬像素嘅SuperCCD加入xD卡入面，令相片解像度最高可達2,832×2,128，成系列之冠。而動畫拍攝功能亦係今次重要賣點之一，解像度達640×480，兼且做到每秒30格嘅流暢度，比同級機嘅320×240足足高一倍，呢個質素已經極之接近DV帶及MPEGII格式，令相機加添更實際嘅用途，不過暫時xD卡最大也只是128MB，只錄到約2分鐘高解像的片段，要取代DV機，相信還要看xD卡的發展。

擷取動畫定格清晰利落
對DV帶擷取定格畫面有經驗嘅用家，普遍都認為DV帶定格質素只屬一般，而FinePixM603喺呢方面就較為優勝，在動畫中擷取單格畫面比DV帶清晰利落得多。今次行貨反應都算快，睇個勢香港會不斷將行貨發售日期追近水貨，令一眾唔想用日文介面嘅用家，毋須苦候一輪先有行貨機用。

超大2.5"屏幕
除第三代SuperCCD及高解像動畫拍攝功能外，M603在機身上走回F601嘅直身設計，不過就較為偏向方形，冇咁流線，加埋背後首次配備特大嘅2.5"LCD，驟眼望落去十足十一部DV機咁，而且觀乎其高解像動畫拍攝功能，相信富士亦有心吸納一批DV入門用家。2.5"LCD喺數碼相機市場嚟講算少有，暫時只得鏡王Luica機有得揮，而特大LCD好處係影同睇都好舒服，尤其係取景攞構圖時，較易掌握兼唔怕對錯焦。
其他功能方面，機身局限只有兩倍光學變焦，配合數碼變焦後最大可作8.8倍變焦效果，一般用家尚算足夠。
M603走全自動功能，快門速度由1/4至1/2,000秒間自動變換，而ISO感光值亦係全自動，由160至1,600，較暗嘅環境都唔使用太慢快門拍攝。

實地測試
由於容量太大，未能認真測試高解像模式之動畫情形，如長時間拍攝之流暢度，在記憶卡中嘅存取速度等，暫時只可一試短時間拍攝，發覺直身機手感頗佳，不過肯定嘅係特大屏幕用得好開心，比FinePixS602好得多。

Profile
感光元件：300萬像素SuperCCD
變焦：兩倍光學，配數碼8.8×
快門：1/4至1/2,000秒（自動）
ISO：160至1,600（自動）
體積：64.5×93.3×31.6mm
重量：約210g

同場加映
首部採用SuperCCD嘅xD機
今次富士發布會除M603較矚目外，同場重有一部型仔FinePixF402及CX-400打印機登場。FinePixF402喺10月13日已於日本推出，屬xD機首部採用SuperCCD嘅機種，不過有效像素只得210萬，倍乘後亦只屬四百萬級。

約$3,250
發售日期：11月底

高質相片打印機
至於CX-400打印機，則以印製高質相片為主要用途，打印原理為PrintpixSystem，其實即係接近舊有嘅熱昇華原理，好處係唔會有墨點出現，相片質素跟傳統沖曬差不多一樣。

約$4,000
發售日期：11月底

富士攝影器材
查詢電話：24088663