人氣組合KinKiKids兩位哥仔堂本剛同堂本光一紅咗咁多年，出親乜嘢細碟都攞硬冠軍，重破埋世界紀錄，不過近排就不斷傳出佢哋不和，事務所就梗係話冇咁嘅事啦！但咁啱早排我大口羅拉睇到一個由KinKiKids所拍嘅DARS朱古力廣告，內容講堂本剛妒忌堂本光一有靚女投懷送抱，佢兩個啲表情真係一絕，打死我都唔信係演技咁簡單！
呢個廣告喺一個公園入面拍攝，阿剛同光一排排坐，但光一就甜蜜得多，因為有個混血靚女友親手餵佢食朱古力，光一個樣簡直冧到入心，坐喺隔籬嘅阿剛當然係唔alright啦，即刻矇起雙眼，眼超超咁，好似想打光一一餐咁嘅款。
事後光一話個廣告非常表現到戀愛嘅甜蜜，就好似即溶喺口嘅朱古力咁甜，但嗰邊阿剛就大呼冇癮，重話：「如果現實生活中喺我身上發生啲咁嘅事，我唔㷫就奇！」