猜枚，理你拳腳定兵器，定時定候總有新花款。
今期吧場有何新枚？蒲慣劈酒場嘅Alan話：「呢隻枚叫『高官枚』，超爆！呢期好多人玩，貪佢易玩又過癮，隻枚搵啲高官嚟開玩笑，我第一次見人猜都忍唔住笑出聲。」有幾爆笑？Alan話搵兩個靚靚Model示範畀你睇喎。
記者：陳漢榮
攝影：周旭文
模特兒：Pauline、Lydia
場地：歌德餐廳
話說Alan上周酒癮發作，約同三五知己到旺角某酒吧夜敍，當半打啤酒盡數飲清、打算結帳離場之際，發覺鄰枱有人猜枚猜得興高采烈：「佢哋興奮到企起身叫枚，啲身體動作好誇張，邊個輸即飲，飲得好豪，成為全場焦點。」身為蒲精的他也居然搞不清他們猜甚麼枚，遂決定上前搭訕，因為：「有我唔識嘅新枚？梗要學吓嘢。」
埋枱，自我介紹，Alan直入正題，不恥下問，方知此乃吧場新枚──「高官枚」。
「哦！舊瓶新酒，玩法依舊，叫枚不同咁解啫！」所謂的「高官枚」，其實蛻變自以前的「黃飛鴻枚」，以前叫枚只叫「黃飛鴻」、「李小龍」、「史太龍」，現在則叫「老懵懂」、「大話松」、「掃把頭」，各配不同的爆笑動作，誰窒枚、輸枚、叫錯枚即罰即飲，當然盤口自定，飲酒多寡悉隨尊便。
Alan一點即明，不用2分鐘已玩得非常純熟，兼有以下評價：「超爆！至啱女仔玩，因為唔使太用腦，又過癮，可以影射班偉大高官嘛。」那何謂「用腦枚」？Alan說：「當然係我嘅強項──『抹車』、『骰盅計數』，鬥智鬥力，少啲道行都飲死你……」
Alan：「『高官枚』易學易精，叫枚時至緊要記熟配對動作，實際點玩？𠵱家就叫兩位靚靚Model即場示範，學嘢喇！」
枚王Profile
Alan（26歲）
超過10年蒲吧經驗，至愛猜枚劈酒，永冇話屎枚爛猜唔願飲：「唔敢自封枚王，不過乜枚我都識少少咁解啫。」
玩法最少2人對局，最多4人分Team猜Partner，每人先派5隻，跟方向順花出，但不以『順花』結牌，改以『順點數』結牌（即手上啤牌的點子或加起來跟枱面的相同），以最快出掉晒手中牌者為勝，一家結牌，其餘各家飲酒。
Alan：「唔好問我呢個遊戲點解叫『抹車』，因為我都唔知，其實『抹車』係種撲克遊戲，蛻變自以前嘅『LastCard』，玩法大同小異，但難度加深，好考記性、布局。」
1﹒認定Function牌
「2」：罰下家2隻，順花出
「8」：轉花，任何時候可以出
「J」：轉方向，順花出
2﹒一罰即飲
上家出「2」仔，下家即飲一Part，Last邊家結唔到牌，再飲！
3﹒點數結牌
枱面係『J』，我揸『2』仔同『9』仔，加埋即係11，即結！
玩法最少2人對局，先搖骰，最少5粒骰，最多10粒骰；後叫數，可叫1至無限大；再玩心算，任用＋、－、×、÷的計算方法，不得郁動骰子，以拍枱動作表示心算有結果，最快計到答案者為勝，最慢者、計錯數者罰飲酒。
Alan：「『骰盅計數』人人都識玩，但玩得精梗有Technique，廢話啲講，玩得多自然有竅門，初學者不妨先玩5粒骰，計24，因為24最多局、最易計2、3、4、6、8、12都除得盡。」
Alan：「計數玩心算一樣有Formula，交多啲學費就自然玩得精，不過𠵱家醒三兩招必殺技過你啦。」