何超儀雖然是賭王何鴻燊女兒，但骨子裏她只當自己是普通人，平時食慣大牌檔，絕不是大小姐。她還自嘲自己對腳只有35吋長，個殼（外形）唔正，有工做已很滿足。
何超儀日前接受本報訪問，表示雖然她是賭王何鴻燊的女兒，但不要以為她出街要坐Benz、買衫要去Joyce、食飯一定要有魚翅。她只是一個普通人，一個很有表演慾及腳短的普通人。
入演藝界，原來是何超儀自小的心願，因為她自細就好有表演慾，她說：「一有人話簽我做歌星，我就連大學都唔讀返香港。喺娛樂圈發展都算托賴，因為我只得十三班教育程度（相等於香港中七程度），今時今日有份工，收入重唔錯，而且重叫做逐漸有啲成績畀大家睇到，好似我下個星期就會去出席米蘭影展，因為我做嘅《恐怖熱線之大頭怪嬰》有份角逐最佳女主角，以個人名義計，呢次係我第一次被提名國際影展，都算打咗支強心針！唔好以為我老竇有錢就唔使做，人始終有自己嘅事業。我冇諗過進軍荷李活，自問個殼（外形）唔正，對腳得三十五吋長，都係專心做好份內事啦！」
至於與陳子聰和何超儀的戀情，她表示連父親賭王亦默許，她說：「起初同陳子聰拍拖都幾驚，佢當時出晒名係媾女王，所以最驚佢同完我就閃，我咪大大煲！但係佢同我講『我都玩夠、癲夠啦，我剩係想搵過個穩定同合適嘅女友』。我係一號大醋埕，我唔怕佢花心，係怕佢受人𠱁啫。𠵱家幾好，屋企已經認同佢，證明我冇揀錯啦。至於結婚、生仔就暫時未有打算。」採訪：何永寧 攝影：仇志德
場地提供：油麻地百老匯電影中心