劉鑾雄昨日親口證實女友呂麗君為他誕下女兒的消息，但對於被踢爆送樓給女友一事相當不滿，他直指放料者是「專業小雞」，對方過去數年花去大劉約七、八千萬元，如今不再風光，所以放料報復。大劉又指對方現在為往上爬及接工作，只收十萬八萬便願意提供性服務。
城中超級富豪劉鑾雄的女友呂麗君（Yvonne），日前在山頂明德醫院誕下女嬰，榮升第三任父親的大劉，前日不肯就此事作回應，但當晚約七時，本報卻發現大劉往醫院探望Yvonne。昨日記者再致電大劉，終獲他親口證實已添了一名女兒。
十萬同人多次上床
問到有關BB女的體重、Yvonne是否自然分娩及是否送贈二千萬元禮頓山豪宅給女友等問題時，大劉均以私人事不欲多談為由，拒絕回應。不過，對於女兒出生及送贈豪宅等消息曝光一事，大劉卻表示已揪出幕後放料黑手「專業小雞」，更直指對方是出於妒忌Yvonne及緬懷過去風光日子，所以以放料做報復手段。
大劉說：「呢個放料人唔係娛樂圈中人，佢𠵱家做緊『專業小雞』，因為經濟唔好，只要喺佢平時收開嘅專業服務費之外再加多十萬八萬，佢就會肯同人多次上床。其實佢本身嘅經濟環境都唔錯，因為佢喺我身上搵咗唔少錢，但因為家庭問題，佢心理好自卑，好唔平衡，為咗向上爬不惜一切，四處電人，唔理個男人有老婆、或者外形似足佢阿爺都照殺，只要有利用價值，或者肯畀工作佢做，佢都唔放過，照殺可也。」
佢想打擊Yvonne
大劉續說：「佢以前每個月平均最少都使我六、七十萬，多則過百萬，幾年時間，佢前前後後使咗我七、八千萬。佢𠵱家得唔到以前嘅福利同揮霍，當然好緬懷以前嘅風光日子，覺得Yvonne冷手執個熱煎堆，所以對Yvonne懷恨在心。」
問大劉此人究竟是誰？他說：「我唔方便公開佢個名，但呢個人好清楚我嘅性格，如果一件事曝咗光，好似買樓咁，我就即刻唔做，明明原本想買都會即刻唔買，佢放料畀傳媒，想藉此去打擊Yvonne，想我遷怒於佢，咁最終有損失嘅就會係Yvonne。但我對於『專業小雞』嘅為人已經一早睇穿晒，又點會上佢當？佢愈係咁做，我愈係諗要點樣為Yvonne做番啲嘢。」
好鬼幼稚同心毒
大劉說：「我已經忍咗佢好耐，之前將Yvonne嘅背景同埋錯誤資料放畀《壹週刊》嘅就係佢，我咁肯定係因為有一啲流料係得佢一個人知，但係登咗出嚟，即刻就現晒形。之後佢又放料畀某老實商人嘅周刊，洩漏Yvonne同公司同事嘅行蹤，等嗰本周刊派人去機場等佢哋。佢嘅所作所為，唔係一次半次，而係一百幾十次，好鬼幼稚同心毒，佢好想去害人同報復。但係無論點，有啲嘢都係冇得返轉頭㗎啦！」
力指「專業小雞」很想害人及報復的大劉，表示仍會祝福對方，希望她肯及早收手。大劉說：「我希望佢可以放過我，我好有誠意去祝福佢，希望佢畀心機去做佢愛做嘅嘢，不過要小心啲，唔好做鴕鳥，因為佢做緊嗰行啲人，都知佢四處電人、陪人上床嚟交換多啲工作。」
此外，對於大劉生女一事，榮文蔚昨晚出席中環ZENITH名表展時說：「我唔知佢生咗個女，但都應該開心嘅，或者我都會送禮，但暫時未諗到。」問她可會與大劉分享湊BB心得時，榮文蔚說：「唔使嘞啩，同呂小姐就或者會嘅。」
大劉昨日大爆有「專業小雞」向傳媒爆料，問榮文蔚可知對方是誰時，她表示不知道。會否致電大劉詢問？榮文蔚反應甚大地說：「冇可能呀嘛！」
其後何超瓊和何柱國先後到場，談到大劉口中的「專業小雞」時，超瓊笑得十分開心，但她說：「第一，我冇聽過，第二，我唔想知係邊個。」而何柱國則笑笑口說：「乜大雞小雞呀？咁高級，我淨係識油雞啫！」
採訪：張止寒、梁錦雯