星期日跑馬，第七場跑出大冷門，四十九倍嘅「成功駒」竟然快放贏咗隻超級大熱門「東方明珠」（一點五倍）兩個半馬位，令全場馬迷大跌眼鏡，左丁山賽後碰到「東方明珠」練馬師蔡約翰，覺得佢好唔高興噃。本來左丁山都想落番啲注捧場，但沙圈內人人話「東方明珠」贏晒，香港會隻「皇者」又話有機會跑入位置，於是就忘記了隻「成功駒」。
馬主就高興到跳起，成班老友同佢握手握到手軟。呢位馬主黃偉慶以前養過兩隻馬，成績甚曳，從冇威過，七、八年來，今次係第一次拉頭馬攞獎金，兼且咯喎，呢隻馬買咗百幾萬，你估有冇回報呢？梗係有啦，聽講黃偉慶呢次扑到正，乜嘢買馬費、養馬費都贏晒返嚟，獨贏、位置、連贏、位置Q，「真奇妙」夾「成功駒」一個孖寶，完全中晒，威過威士忌！
黃偉慶係AIA人壽保險嘅大哥大，外號「阿爺」，佢主理嘅「成功區」，有二千幾名經紀，做人壽保險嘅，唔識得「阿爺」，好打有限，Edmund謝見到佢，都非常客氣㗎。據一位保險經紀安東尼對左丁山講，「阿爺」投身保險界超過四十餘年，佢當年喺桂林街新亞書院讀書，跟過錢穆唐君毅等大師，後來因為學校窮，老師窮，學生更窮，於是輟學為生活奔馳，卒成為人壽保險界嘅大爺，賺幾多錢就要靠估咯。黃大爺對新亞書院好有感情，曾經話過希望與新亞校友夾份養馬喎。