羅文逝世後，促使全港各大唱片公司爭奪其舊歌版權，當中猶以經典金曲《幾許風雨》競爭最為激烈，結果EMI終成功以約六十萬元，向華星購得《幾》曲版權，同時更會在十一月前，搶閘推出羅文精選碟。
EMI總裁陳志光昨日承認消息屬實，他透過電話說：「我哋原定喺十二月出羅文精選碟，但呢幾日我哋係未停過收到歌迷嘅電話，佢哋好想快啲買到一張比較完整嘅精選，所以我哋先至加快推出，我哋係幫華星買咗《幾許風雨》嘅版權，重買咗《同途萬里人》、《柏林圍牆》等十幾首歌嘅版權。」據悉這張精選碟約收錄二十六首羅文名曲，約售一百元。
而擁有羅文早年歌曲版權的娛樂唱片，則會在十二月推出精選碟，而英皇暫不會推出羅文精選，英皇高層甘菁菁表示，旗下歌手翻唱羅文九首舊歌的大碟應在十一月初推出，並會收錄羅文與英皇歌手合唱的《天生不倒》。