傳出配股多時的香港葯業（182），10月初曾停牌話配股，點知最後唔成事，結果復牌股價急跌，但近排竟然顯著回升，小初開頭重以為幕後想崔護重來，重提配股一事，但經紀陳就話唔係。
之前香港葯業配股唔成，復牌後股價一度跌落66仙，但近排已經升回80仙樓上，噚日就微跌1.21%，收82仙，成交有410萬，叫做不過不失。
經紀陳話，隻股可以回升，據聞係幕後炒家度到新水，至於配股一事就仍未有下文。佢重話，現階段隻股屬乾炒牛河格局，不宜跟進。
另外，經紀陳又叫小初留意吓華南實業（554），佢話隻股年頭股權易手後，8月時搞咗一次批股，定價每股23仙，配售1.65億股，集資3700萬元。
唔知係咪配售以盡力配售方式進行，跟住華南股價就愈挾愈高，噚日又升8%，收54仙。睇怕股價升到咁高，新股應該批得出。
慕容小初