皇仁最出名嘅校友——霍英東，上周三同十四位皇仁師弟喺中華遊樂會撐枱腳，實行身教。當晚有份去飯局嘅學生好開心話畀八方聽，霍師兄對佢哋好似一家人咁親切，諗到乜嘢就講乜嘢。
八十歲嘅霍英東回憶前半生經歷，講到父親早亡，非常傷感。當講到喺皇仁嘅日子，佢自謙唔鍾意讀書，只喜歡運動，但又自爆考過第一名、攞過獎學金，可惜因香港淪陷被迫輟學，霍老重同學生分享最近沖冰水涼保持健康嘅心得，學生問到佢點減壓，霍老答話做運動囉！
而皇仁為慶祝一百四十周年校慶，噚日搞咗個舊生聚會，三代同堂，最年長係九十一歲嘅黃義華，佢大講校園趣事，話自己三十年代畢業，係佢最先籌辦皇仁同女校庇利羅士嘅聖誕舞會；但係五十年代畢業嘅歷史學家陳福霖，就話當年皇仁仔原來對女拔萃嘅同學更偏愛，𠵱家嘅皇仁仔就話間間女校都有不同優點，真滑頭。
噚日最搞笑一刻，係八十七歲嘅舊生、南華地產老闆文洪磋，忽然攞咗封捐款信出嚟，話曾經同皇仁校長講要捐一百萬，點知大家以為佢死咗，捐款一事冇咗下文，所以噚日聲如洪鐘嘅文老人家，不停大嗌「我未死㗎！」又會咁烏龍嘅？
傳真︰2623-9278
電郵︰