有富豪包租公之稱嘅倫志炎，近半年積極掃商舖，估計買入嘅舖位市值近一億元。美聯物業倪金河話，倫伯最近第五度入貨，用一千零五十萬元，向一家桑拿浴室公司，購入沙田瀝源街沙田娛樂城二樓全層。
間舖八千呎，原業主一直自用，𠵱家以售後租回形式賣畀倫伯。以月租十萬元計，回報率十一厘四。倫志炎密密出擊，早前就一口氣買入慈雲山同深水埗，兩間由老人院租用嘅舖位，租金回報率都係十一厘。其後再用三千三百萬元購入西環舖位，回報率雖然冇咁高，都有成十厘㗎。
出咗名數口精嘅倫伯，高峯期曾擁有三百個住宅單位，包括柴灣杏花邨、紅磡黃埔花園同觀塘麗港城等，不過已先後賣咗超過百五個，剩番嘅用嚟長線收租，估計呢批單位市值四億。佢近排轉攻舖位，相信係因為租金回報率和味過住宅。果然老而彌堅，轉軚轉得快。
即將成為新盤焦點嘅上環帝后華庭，市場憧憬重現當年房協嘅上環荷李活華庭，同埋西環加惠臺風采，早早租定舖位，做該盤支援站。
龍頭大哥嘅中記，一早喺附近開定舖，做好部署。利嘉閣就喺德輔道西搵咗個二百幾呎地舖，租約期一年，專門做帝后華庭生意。聽講，另一大行美聯，靜靜雞搵緊落腳點，一啲都唔輸蝕。鴻運就好似剛物色到舖位，月租二萬樓下，租期半年。發言人估計，個盤屬速戰速決型，所以租約唔使太長。
世茂集團喺上海嘅豪宅項目，世茂濱江花園同世茂湖濱花園，上個禮拜在港舉行展銷會，三日夾埋有成千人參觀，預訂登記超過三百個，估計明年三月可揀樓。
最近有批地產代理到過上海，參觀幾個樓盤，蘭西綜合佢哋嘅意見，都覺得世茂集團呢兩個豪宅盤質素較好。由於參觀嘅經紀唔係代理呢個盤，喺冇利益衝突下，意見值得相信嘅。
發展商為咗賣樓，不斷以各種各樣嘅優惠吸引買家，搞到成個市好似淨係得一手樓咁，實情當然係二手交投高過一手樓啦，若果唔係，個市就悲嘞。𠵱家代理行整體嘅成交量，一手只約佔一成半到兩成。不過，因為做一手促成交易嘅時間會快過二手，所以好多經紀都走晒去做新貨，假如嗰個月冇乜新盤開，代理行嘅收入就會大減。
新地同恒基聯手發展嘅紅磡半島豪庭，早前搞嘅睇樓抽獎，禮拜一抽出幸運兒。據代理中原地產助理營業董事王鎮維話，住喺葵青區嘅黃先生攞到獎，但佢就尚未落實買半島豪庭，只係考慮緊兩房細單位。唔知中記遲啲有冇機會做得成生意呢？
聽王鎮維講，半島豪庭平日有十幾枱客睇樓，周末就有百幾枱，有一半重係新客㖭，但好多睇完都係因為價錢問題未肯入市。
蘭西
電郵地址：