所謂「工欲善其事，必先利其器」，阿仙奴部份球員似乎唔知呢個道理嘅重要性，我求大俠睇電視直播見到佢哋對歐塞爾時，着錯波砵好似滑雪咁跣到一仆一碌，重搞到雲格無得贏波慶祝五十三歲生日，真係唔知好嬲定好笑。
其實以阿仙奴班球員咁有比賽經驗，照計無理由唔識因應天氣同場地環境着合適波砵，分分鐘對表現影響好大，結果就睇住羅倫、韋拉、龍格保個個不停跌低之後又起身，認真失禮，唔認得波衫重以為嗰隊係歐塞爾㖭。
而我求大俠淨係見到韋拉識得及時走去場邊要求換過對波砵，之後就真係轉身都唔會咁易跌低。唉！我求大俠唔係見佢哋輸波先至咁講，只係換波砵唔係要好多時間啫，咁都唔做？真係唔明咯！
上季曾經外借到保頓的前鋒波碧，今季就終於離開多蒙特，轉去名氣唔大嘅漢諾威繼續發展事業，表現重唔錯，已經有六球「士哥」，最近重得到德國國家隊教練禾拉垂青，話有意重召佢。我求大俠好同意禾拉所講，唔理邊個，只要有入球嘅前鋒就考慮，而波碧唔想坐冷板，去其他球會發展嘅積極想法都值得學習。
謝暉足球事業唔多如意，幾經艱苦先喺德乙落班，但呢位前鋒原來幾有生意頭腦，今年四月投資一千萬人民幣喺澳洲同其他歐洲國家引入高質素人造草坪，然後賣畀上海各間學校建運動設備，據講旺季每個月可以賺到百多萬，預計今年回本。草坪生意可以賺錢，又可以幫國內學校發展體育，我求大俠都佩服！佩服！
熱刺最近就派人來華考察中國球員，其中上海申花杜威同吳承瑛都成為被考察人選。誰不知上海申花總經理樓世芳話與其畀旗下球員到外國球會只係試腳數星期，之後冇下文回國，不如唔好去咁話。其實，年輕球員有得出外試腳，吸取經驗係難得機會，我求大俠都唔明點解重有呢種諗法，荒謬至極！
法國「一哥」里昂前晚主場以三比三迫和國際米蘭，我求大俠雖然已經知道即時比數，但見場波咁多入球，都捱吓眼瞓睇埋個轉播，見到當卡里爾為里昂射成二比一嘅時候，隊友迪亞拉上前同佢慶祝，點知開心得滯成塊面猛撞落去卡里爾個頭度，卡里爾就好似冇事，但係迪亞拉個嘴就爆咗缸，樂極生悲得嚟，個情景都幾搞笑！
逢周一至周五見報