樂壇新人、財爺夫人伏明霞好友張鎧潼噚日去咗中環,出席「馬拉天使AVEP新碟發佈會」,佢好勞氣咁要記者幫手聯絡許志安(安仔),因為佢好不滿安仔曾經放佢飛機喎。
事緣張鎧潼喺一個卡拉OK聚會上,識咗安仔同蘇永康,佢話:「安仔重問我攞電話號碼,之後佢打電話約我食飯。點知到咗嗰日,佢失晒蹤影,佢又唔肯講佢個電話號碼畀我知,我咁大個女都冇畀人放過飛機,佢累我嗰日等咗佢成日。」
問張鎧潼覺唔覺得安仔有追求之意,佢話:「我哋見過一次,不過佢份人幾好傾,我始終覺得一個男人講過嘅嘢要做得到,我自己就最講口齒。」
張鎧潼噚日又戴咗個假鼻環亮相,佢話:「我都穿咗臍環,亦都夠膽穿乳環,不過就唔會除衫畀人睇。我覺得穿臍環同乳環都好性感。」
最近有消息話麥浚龍(Juno)會參與無綫新劇《新牌大狀》演出,重有機會同靚女廖碧兒合演情侶,大家都知廖碧兒嘅身高同Juno有一段距離,所以呢個組合都幾突破。噚日馮仁昭喺電視城見到廖碧兒,佢竟然好抵死咁話:「我都未知係咪真係會合作,如果係,佢或者要着高踭鞋喇!」
有消息話楊婉儀會同拍拖三個月嘅男友王瑞勳喺下年初去美國結婚,不過經了解後似乎冇件咁嘅事。
馮仁昭噚日同楊婉儀傾電話時,佢親口否認話:「唔係,我哋未有結婚打算,我爸爸媽媽的確返咗香港,每年佢哋都會返嚟探我,當時本周刊個記者話收到消息嚟問我,我都否認咗!」
王力宏日前去咗新加坡舉行演唱會,佢可謂魅力沒法擋,吸引咗成萬位觀眾捧場。演唱會上佢一共換咗八套衫,喺唱緊《不必問別人》嗰時,王力宏更大益台下觀眾,唔只着背心露腰,重露埋兩點,令觀眾不斷尖叫。之後又表演後空翻,果然係身手敏捷,唔怪得咁受女仔歡迎啦!
梁詠琪(GiGi)日前喺台灣做宣傳,佢話自己鍾意用手機製造浪漫,平時都會用手提電話傳達訊息畀男友同家人。就算GiGi身在異國,佢都會利用手機同家人或另一半保持聯絡。
GiGi最近俾台灣一個手提電話商睇中,唔單止畀錢GiGi拍MV,所有佢嘅歌迷重可以透過猜謎活動得到新電話,GiGi嘅歌迷就有福啦!