外圍美股大漲小回，市場又盛傳有美資由債券市場流向證券市場，帶動港股造好，恒指勁升255點，收報9804，成交73.56億元，最特別是期指成交大增至逾2.45萬張，較周二多逾1萬張。ｉ師傅話，大戶開好倉為主，好友勢力開始坐大。
事實上，全球經濟低迷，各主要經濟強國不斷為經濟注入強心劑，衰咗十幾年嘅日本，經濟亦見有起色，而中國經濟繼續高速增長，再加上資金充裕，利息長期偏低，股市一旦有起色，資金便會湧入。
好友噚日主要掃落後嘅電訊股，中移動（941）升近5%、聯通（762）升6.8%，和黃（013）亦升3.6%，電盈（008）股價細，當然更易被掃高，全日升9%，成交增至1.7億元。
市場見電盈升得咁勁，即刻又話恒指服務公司唔會將佢踢出藍籌之列。其實呢一點阿虎早就料到，電盈話晒都持有香港電訊，唔會咁易被踢出局。恒指服務公司可能下個月公布恒指成份股新一季檢討結果。
高寶綠色（274）噚日受到民企股拋售潮拖累，市場傳出有策略性投資者減磅，拖累股價一度跌逾10%，不過稍後傳出公司好快會分拆旗下污水處理廠上市，消息令跌幅收窄，收報1.36元，僅跌2.9%。
據Cookie所收到嘅料，的確有大戶正在減持，但有幕後人士維持秩序。至於秩序可以維持幾耐，真係天曉得，幕後過往做咗唔少工夫利好股價，加上有鄭裕彤擺明車馬捧場，相信要長期維持秩序亦非太難。
阿虎