全球經濟持續不景，將一向冧價極快嘅IT產品，進一步推落無底深潭。最近有公司更以割喉價推出二千蚊有找嘅齊料機箱，包埋CUP、硬碟同記憶體，插番舊芒同Keyboard就即刻用得，令一眾486、586舊機持有者，都心思思想趁機換腦，連半工讀嘅Natalie都話要儲錢換新機。
記者、攝影：徐影龍
當筆者告知Natalie市面有部電腦只賣$1,999時，佢立即好興奮咁問長問短，原來Natalie想換電腦好耐：「我屋企部腦重係用緊咸豐年代嘅Pentium233MHz，由中學捱到𠵱家讀大學，以前都算夠用，不過近呢幾年開始頂唔順，莫講話睇碟，就算上網開個《IE》都要等餐𤷪，重成日Hang機，試過有次做咗大半功課先嚟死機，激到我死咁滯！」捱得咁辛苦點解唔換部新腦呢？原來Natalie尚在求學階段，只會閒時接散Job做Model，收入有限，又唔想加添屋企經濟壓力，所以對部「老腦」只可採取忍字訣。
其實Natalie只係對部腦嘅處理速度有所不滿，舊有嘅芒同鍵盤等硬件都冇必要換，所以今次呢部平價PC啱晒佢口味。「二千蚊唔使可以有1GHz處理速度，對我嚟講已經好夠用，我又可以用番舊芒同鍵盤，唔使全套電腦換咁花錢。二千蚊我只需一個月慳啲使已經儲到，終於都可以同部舊腦講拜拜。」
U-Buddie另一賣點係機身設計得極小巧，尺寸只有75×22.8×22.8mm，約莫只比舊款PlayStation遊戲機稍大，相當之慳地方，對於使用舊式大牛龜機箱嘅用家，又或辦公室用途都好適合。其他功能方面，雖只配有一個24XCD-ROM，不過讀取速度跟一般光碟機分別不大，就算睇VCD都好流暢，唯一問題係冇咗已成標準配備既燒碟功能。由於顯示晶片及處理器嘅限制，想玩番𠵱家流行嘅3DGame會有啲難度，若將解像度及貼圖質素調至最低要求，仍可勉強一玩。
擴充性方面，雖然底板預留一條PCI插槽，不過機箱尺寸限制，根本唔會有配接卡插得落，就算想插一啲細卡如EthernetCard，AMRModem卡，都要削去卡後之鐵片先放得落，工夫太大，不如用番內置嘅LAN同Modem算數。
呢部由Rootek推出嘅平價電腦名為U-Buddie，最大賣點係價錢跌至新低，二千蚊已經有找。能夠做到咁平，主要係因為機內用盡各式平價硬件，所有顯示卡、音效卡已整合喺底板唔在講，連處理器都只係採用VIA1GigaPro，即係曾力爭處理器市場嘅CyrixCPU，成本賣價比AMD更平，加上只配有128MBSDRAM及10GB硬碟，全部都係差不多淡出市場嘅產品型號，所以令U-Buddie成本價比一般砌機舖頭更低，做成呢個$1,999割喉價。
雖然處理器時脈速度只有1GHz，同現時普遍嘅1.6GHz甚至2.6GHz有一段距離，不過已足夠應付文書工作嘅需要，就算上網同收發電郵都冇問題，對於真正只需電腦工作嘅用家嚟講非常適合，毋須浪費金錢於購買用唔着嘅強勁處理能力之上。
$1,999（不包芒、鍵盤及滑鼠）
1.機能實在一般，用家想清楚自己需要先好買，如一般文書處理及上網則冇問題。
2.賣價$1,999係唔連芒、鍵盤同滑鼠，用回舊有配件便可。
3.跟機不設任何WindowsOS，現主流嘅《WindowsXP》零售版約$1,600，用家不妨向砌機店舖購買冇盒嘅OEM版本，價錢差不多平一半。
4.硬碟只有10GB，裝入作業系統及應用程式後容量所剩不多，又不可燒碟備份資料，故不宜儲存太多容量大嘅檔案，如Movie檔、MP3及高解像數碼相片等。
RoodtekTechnologyLtd
查詢電話：29470868