出名嘅女人搵錢零舍有辦法，爭人錢又識得搵人頂自己條數。好似大眼咁，早兩年做生意爭落一條街數，成五百萬咁多，債主梗係追佢債啦，大眼嗰陣經濟情況已經好唔掂，但佢好快就搵咗第二間財務公司借筆錢嚟還債，好鬼有計。
其實間財務公司肯借錢畀大眼，唔係因為同大眼有路，而係大眼搵到一個律師做擔保人。做得財務公司嘅，既然有人肯認頭做擔保，咁梗係做啦。但大家諗都諗唔到，大眼嗰五百萬欠債最後入咗律師數。
雖然話大眼肯同律師瞓，但好多人都覺得條數咁大，大眼唔值呢個價，替律師不值。不過情人眼裏出西施，律師孭咗條數，唔止冇詐型，到𠵱家重同大眼維持非一般關係。大眼𠵱家雖然周身蟻，但個律師重做緊佢身邊嘅重要軍師㗎。
好多女明星為咗錢都肯畀有錢佬包，因為俾人包嘅錢最易賺，不過如果可以搵到真愛，都會肯放棄財路嘅。好似過氣影后咁，識咗男友之後，初時都仍然瞞住對方出去搵錢，後來男友知道之後詐型，過氣影后即刻收手，重同佢啲客仔話以後唔使搵佢，咁唔知係咪叫做為愛情犧牲呢？
吳文忻最近以六位數字簽約時裝品牌LeRoi做代言人，噚日LeRoi所屬嘅公司喺金鐘宣布公開招股，吳文忻亦有出席，佢重着住公司嘅低胸裙到場。但最搶眼嘅係佢右手戴咗條閃閃令嘅鑽石鏈，問佢係邊個送？吳文忻就神神秘秘咁話：「朋友送嘅，係上星期我嘅生日禮物，男定女送就唔記得咗，唔好問啦。」
由關之琳同內地演員葛優主演嘅《大腕》，獲得內地第二十五屆《大眾電影》「百花獎」嘅最佳電影獎項，葛優重憑呢套片得到最佳男演員獎項，最佳女演員獎項就由內地演員周迅奪得。而同時獲得最佳電影嘅，重有《二十五個孩子一個爹》同埋《法官媽媽》。
足足有十五年冇嚟香港開演唱會嘅安全地帶，終於嚟咗啦！噚日佢哋到港，本來會喺下午舉行周四同周五演唱會嘅記者招待會，但因為靈魂人物玉置浩二近月身體唔係幾好而取消。好在噚日見到佢拖住老婆安藤里子出嚟都好有笑容，重話夜晚會出街食飯，咁都冇咁擔心。
陳小春噚日接受新城電台訪問，對於前度女友車婉婉喺商台接受訪問時，話以前個男友鍾意蒲同媾女，成為嫌疑犯嘅小春話：「蒲都係聚會嚟啫，有人鍾意喺屋企吹水，我只係去少人嘅地方聽歌，都係聚會。我就唔知係咪講我，但我唔認㗎！」不過車婉婉就話從未同過小春拍拖，小春聽到呢句話就好開心拍心口話：「咁即係唔係講我啦！」