同舊日粵語片紅星陳寶珠傳過緋聞嘅警務處副處長劉玉權，啱啱喺前日退休。既然退休唔使做，佢乘機呻吓以前做磨心嘅苦況。佢對最新一期嘅《警聲》話，警察好容易變成「夾心人」，因為一方面要畀人示威，另一方面又要避免其他人唔會受到無理滋擾，就算自問做到「公正無私，不偏不倚」，但都會俾人鬧，重話「論事易，作事難；作事易，成事難」喎！
喺警隊做咗三十七年嘅劉Sir，不但無悔當差，重話呢個係佢當年最明智嘅抉擇。咁多年嚟，佢做過軍裝、CID等多個職位，近年就專責行動、支援、刑偵同埋保安各專職部門嘅工作，印象最深刻嘅，係同內地攜手對付跨境嚴重罪行。但由於劉Sir向來唔畀記者埋身，所以大家都唔係好清楚佢有乜嘢威水史，只知佢係寶珠姐嘅知心友！
前日退休，劉Sir揮一揮衣袖，只係攞走一把指揮官嘅劍做紀念，但就留低跟咗佢三十七年嘅座右銘「終身學習，服務為本，公平執法」畀同袍。退休之後，佢會去遊山玩水歎番吓，然後返香港，準備用多啲時間參與社會工作，繼續服務香港，實行退而不休。
傳真︰2623-9278
電郵︰