《魔戒》電影上畫後足足等咗成年，首隻可以讓你在電腦的虛擬世界中，親身經歷《魔戒》冒險的遊戲《TheLORDofTheRINGS:THEFELLOWSHIPOFTHERING》，今日終於正式在香港推出。此Game在機迷及書迷心目中期待度極高，礙於一直發布資料有限，所以更添神秘感。今次筆者有幸在出Game之前兩日，作全港獨家搶先試玩。代理方面再三叮囑只能一人試Game，所以呢個係非常珍貴嘅測試報告，今日就等筆者揭《魔戒》嘅神秘面紗。
記者：朱崇德
如果大家最近有留意網上及Game書新聞，今次這隻《魔戒》遊戲令Game迷最爭議之處，就係有人傳言遊戲的故事內容，並唔跟足原作者托爾金的著述，甚至網上流傳「至尊魔戒」，竟然是從灰袍甘道夫之手，授予哈比人弗拉多！
不過經筆者親身測試玩後，這些傳言可以馬上不攻自破。遊戲故事可算是九成以上跟足原著，而遊戲開端和電影版好相近，是由甘道夫騎馬車入霞爾講起，不過為精簡劇情，入村後就馬上找弗拉多揭開魔戒的秘密，並展開魔戒冒險之旅。
試玩時令人最感動之處，係遊戲場景設計好認真，就以遊戲開始時的霞爾為例，全條村內家家戶戶有門牌、有戶主名稱（因為遊戲有些解謎內容，會涉及這些鄰居）；而繼續玩落去，書中所述及的荒廢瞭望塔、小精靈夢林，都會一一重新以3D立體化展現在你的眼前，而你可以置身其中進行大歷險，真係令每一個《魔戒》迷感動不已！
由於遊戲中三個角色的設定唔同，所以戰鬥能力都好唔同，例如以主角弗拉多為例，哈比人愛好和平，所以只有擲石同一枝木棍，而且威力唔大，不過幸好佢有一隻至尊魔戒在手，遇有緊急情況，可以將它帶上進入異度空間，逃過敵人耳目。不過壞處是魔戒會令弗拉多精神崩潰，精神耗盡就GameOver。
甘道夫是三個中打鬥場面最燦爛的一個，因為下下魔法橫跨整個畫面，破壞力又強，不過一樣會耗費精神力量，所以一定要慳住用；近身戰則有一把精靈長劍Glamdring。
亞拉貢最厲害嘅武器，當然係嗰把斷劍重鑄嘅Anduril啦！遠距離攻擊又有無限弓箭，係實力最平衡嘅一隻。留意近距離攻擊時，SpaceBar會由原本的「跳躍」變為腳踢攻擊，可以將敵人打倒地上，俾人圍攻時好有用！
基本上《魔戒》是一隻動作RPG遊戲，並且全程由第三身視點進行（即係望住背脊嗰隻呢！），可操控的人物分別有主角弗拉多、術士甘道夫和人族王族後裔亞拉貢。遊戲大部份是解謎成份，不過三個角色都有自己一套的刀槍棍棒技能，遇到黑魁首索倫嘅爪牙同半獸人，冇理由唔打佢哋一餐啫！
噢！Game版嘅弗拉多，面目好似猙獰咗啲喎！唔通因為戴得隻魔戒太耐，俾魔氣入侵？
遊戲畫面好靚，開發人員野心好大，基本上佢想在遊戲的虛擬世界中，建立一個完美的「中洲」。霞爾嘅山洞屋、小橋流水，和廢棄瞭望台的怪石處處，真係從未試過用一個咁立體嘅角度，去一讀呢套被譽為20世紀最暢銷嘅魔幻經典。遊戲解謎成份好高，唔係一味靠打打殺殺；如果識走位，隨時可以躲躲閃閃，唔使作不必要的戰事，真係好考智力，耐玩度十足！
查詢電話：27873612
網址：