愛情、親情、友情中，相信親情最可貴，好似讀者翹伊與她的囡囡詩慧，便是最佳的例子。自從詩慧因母患病而食長齋後，翹伊便花盡心思炮製各款精美的齋菜，讓囡囡食得開心，今次翹伊為大家示範兩味齋菜，與各位齋迷一同分享。
記者：區佩嫦 攝影：陳智良
第一次見翹伊與詩慧，絕對給人母女情深的感覺，再聽詩慧食長齋的故事，確實令小記感動。翹伊患有心臟病，詩慧自小已見媽咪經常進出急症室，「8歲那年，媽咪有日突然心臟病發，佢嘅痛苦表情嚇到我呆咗，當時我同佛祖講，願意食長齋再折壽10年，希望媽咪身體健康。」結果翹伊真係大步檻過，之後只係間中有啲心痛，自此詩慧便遵守諾言食齋。
想煮出嚟嘅齋菜味道冇咁寡，翹伊就建議加啲雪裏紅，喺檔口度通常都會見到有兩種顏色的雪裏紅，兩者味道無異，今次翹伊就揀咗綠色的雪裏紅，貪佢顏色夠Sharp，煮出嚟顏色會好睇啲。
為咗令齋菜口感好啲，翹伊就去買素魷魚，呢啲素魷魚用麵筋製成，口感極佳，而素魷魚一炒就會捲埋一嚿，感覺幾特別。由於素魷魚係獨立包裝，夠晒方便，買時留意食用日期就得。
這款名為踏雪尋梅的菜式，原是酒家的名貴齋菜之一，不過做法繁複，所以翹伊便將之改良，味道則較街食的為濃，合乎囡囡愛濃的口味，可見翹伊的確為女兒花盡心思。
冬瓜 1斤、馬蹄 5粒、雪裏紅 3棵、雜豆 4湯匙、靈芝菇 1盒、芹菜 一棵、蛋白 1隻、薑片 2片
糖 少許、鹽 少許、生粉 少許、水 1/4碗
1)先將冬瓜去皮洗淨並切成約5cm的塊狀。雪裏紅浸水去其鹹味，大約浸10分鐘便可。
2)將薑片下鑊爆香，放下冬瓜及少許鹽炒約3分鐘，隨後加水，蓋上鑊蓋焗大約5分鐘，冬瓜腍後放入雪裏紅兜勻上碟備用。將靈芝菇切頭洗淨，加入少許鹽、胡椒粉、米酒等下鑊炒熟後，鋪在冬瓜面上。
3)把雜豆、芹菜、馬蹄下鑊炒熟後，加入芡汁，撈勻後熄火，加入蛋白且不停兜勻，令蛋白形成蛋白絲，最後加上少許麻油調味便可鋪在冬瓜及靈芝菇上。
這款山城素菜的味道較濃，「雖然以水麵筋為主，但其味道則以帶辣味的榨菜作重心。」孤陋寡聞的小記覺得材料中的水麵筋十分特別，聽翹伊講原來水麵筋即係平日在齋舖食到的齋叉燒，只不過齋叉燒經過醃製。
燜後的水麵筋十分入味，有辣辣的榨菜香味，感覺同一般齋菜不同。
馬蹄 12粒、粟米仔 1盒、水麵筋 2條、素魷魚 1包、榨菜 2湯匙、芫荽 少許、薑 2片
生粉 少許、鹽 少許、水 1/4碗
1)將水麵筋切片。把切成段的粟米仔連同素魷魚一起拖水。薑片下鑊爆香，放入馬蹄、粟米仔、素魷魚炒熟，加少許鹽及豉油調味備用。
2)將水麵筋下鑊炒熟，然後加入榨菜、少許鹽、麻油、豉油及1碗水燜約10分鐘，便可將馬蹄、粟米仔、素魷魚等放入鑊內兜勻，最後加入芡汁即成，上碟後加上芫荽點綴便可。