半生經歷兩段坎坷感情的阿冰，早年因丈夫有婚外情而離婚；多年後遇上阿偉，以為可以付託終生，惟男友竟在她臨盆在即時離家不知所終。腹大便便的阿冰，遂把希望寄託在快將出世的女兒身上，可惜女嬰胎死腹中。刻下，心力交瘁的她還要為女兒的殮葬費用而憂愁，感到彷徨無助。
「聽到醫生話BB因為臍帶纏頸死咗，真係唔相信呢件事，我覺得佢喺我肚裏面一路都有郁動。最初，我諗住就算幾辛苦都會自己湊大佢。點知佢突然間冇咗，𠵱家淨係希望快啲籌錢葬咗佢…但自己又冇錢。」獨個兒承受着喪女之痛的阿冰，眼淚不禁奪眶而出。
四十一歲的阿冰，曾從事餐廳侍應及售貨員，八五年與前夫仳離後，為了節省開支，獨個兒租住狹小的板間房，自力更生。九九年，她認識了四十二歲從事電腦維修散工的男友阿偉，兩人共同生活，彼此分擔每月的基本伙食開支，生活尚算安穩。惟受經濟不景影響，去年阿偉經常開工不足；其後，阿冰因為懷孕亦被迫辭退工作，令生活一度陷入困境。
「其實，我哋諗住等經濟穩定啲會結婚，所以知道就快有個BB女大家都好開心，但阿偉眼見收入愈嚟愈少，又搵唔到錢，成日同我講好驚BB出世之後，負擔唔到日後生活。點知兩個月前，佢突然間失蹤，之後我都聯絡唔到佢。」容顏憔悴的阿冰不諱言曾經嬲怒他不顧而去，無奈一切既成事實，惟有慨歎自己遇人不淑。目前，她只希望盡快辦理愛女的殮葬事宜。
「以前我哋都有儲錢，不過自從冇嘢做之後，每個月淨係食同埋交雜費都要幾千蚊，邊度重有錢剩；幾個月前我先至攞到綜援，但生活都係繃繃緊，希望將來身體好啲，可以出嚟搵嘢做。」阿冰無奈地說。
據社會福利署發言人表示，按一般情況，若領取綜援人士的初生嬰孩在出生後去世，社署會發放殮葬津貼，惟阿冰的嬰孩是胎死腹中，所以不獲社署發放殮葬津貼。
蘋果日報慈善基金了解阿冰的經濟苦況後，即時從「殮葬專戶」撥款一萬三千元，助其殮葬女兒。 捐款編號：C0722
暖流熱線
電話:29908688
傳真:23702192
電郵:
網址：