富士在九月正式推出xD卡後，對應新機攻勢連綿不絕，4、5部新機排住隊推出市面，不過大多只屬舊機改良版，兼且抽走多項進階功能，主打入門市場為主。而新一輪攻勢由兩部xD卡機打頭陣，雖然同樣走民用級路線，不過在機能上已作大幅增強。
記者：徐影龍
論機能，之前幾部xD卡新機勉強只算合格，勝在賣價夠平，啱晒入門級用家。而呢部FinePixM603終於針對機能作出強化，除咗終於改回第三代SuperCCD外（有效像素為310萬），重特別改大LCD屏幕，由一般嘅1.8”加大至2.5”，配合640×480的解像度及每秒三十格高質動畫拍攝功能及直立式機身設計，令人感到FinePixM603故意針對DV攝錄機市場。雖然FinePixM603在日本最快要到11月10先推出，不過據聞今次香港行貨會積極爭取，有機會比日本更早推出行貨，此舉對水貨打擊甚大，用家以後都唔使再捱貴價新機喇！
另一部FinePixA203則走回普通民用級機種，外形似傳統儍瓜機，CCD感光元件有效像素值為200萬，不過並非SuperCCD，相片解像度最高只有1,600×1,200。而動畫拍攝方面不及FinePixM603，最高解像度只有320×240，而且不可收錄現場聲音，不過變焦效果則較強，具有三倍光學變焦，配搭數碼變焦最多可作7.5Zoom，預計11月24日推出。
官方網址：