早前曾經同大家提過,話日產與豐田嘅Hybrid合作協議長達十年以上,而兩間公司又會各自發展FuelCell燃料電池系統,咁係咪表示FuelCell要再遲一步才可成事呢?
其實,混合動力Hybrid可解決目前所需,呢個需要性並非來自市場本身,而係來自市場策略所需。Hybrid嘅接受性,目前以北美市場最為受落,因為當地人民容易接受新事物之餘又注重環保,加上該等地區並無柴油引擎汽車供用家選擇,若果要從燃料費上節省金錢的話,Hybrid混合動力系統,可稱得上係最佳選擇;而且豐田Prius同本田Insight呢類行車暢順、寧靜、沒有引擎聲響、沒有澎湃引擎動力表現嘅車種,適合北美市場嘅用家多過歐洲市場。簡單嚟講,其實係歐洲人追求駕駛樂趣同滿足感多於一切,但Hybrid車種行車時實在太平順,故此未必適合佢哋嘅口味。講返市場策略,目前歐盟部份地區,同埋北美部份州份,都有意以個別牌子汽車全年銷售量嘅總廢氣排放量,來徵收稅項。一啲既慳油而又有低廢氣排放量嘅混合動力車種,可有助拉低平均數,令高廢氣排放嘅汽車如SUV及大馬力跑車等等,更具有競爭力呢!
文:陳自齊