近排人人都話居屋不合時宜，停賣停建嘅聲音不絕，不過呢啲反對聲音，都係限於一手貨，二手居屋到𠵱家重有大把市場。啱啱就有位人兄，用235萬買咗個居屋相連單位，由此就知居屋有幾受歡迎。
其實以呢個銀碼，喺私人市場都有唔少選擇，不過當然冇過千呎咁大啦。買家就係睇中居屋抵食夾大件嘅特點，吼實市場放盤，一睇啱就即刻還價，三扒兩撥就得手，聽聞市場同時有幾個客對個盤有興趣，不過就唔夠快手，原來呢名買家住開天馬苑，唔怪之得咁識貨啦。
世紀21富山分行劉倩芬話，成個天馬苑二千八個單位，只有四至五個自製相連單位，暫時冇放盤。啱啱賣咗嘅係D座高層十四同十五室，1134呎，每呎2072蚊，比市價貴少少，但附近過千呎單位僅鑽石山星河明居有貨，最平都要五百萬。
歌星鄧麗君嘅赤柱佳美道十八號故居，上個禮拜五截標之後，不斷有成交消息傳出，中原負責人例牌否認。有傳間屋以三千七萬左右賣出，雖然同業主即係鄧麗君細佬鄧長禧個價重有啲距離，但係之前收到嗰五支標，最高都係畀到三千六萬，賣到三千七萬都算係咁上下，計番間屋2623呎，每呎成萬四蚊。聽聞買家係中資背景人士，唔通係鄧麗君啲fans？
唔講唔知，曾幾何時，投資收租客並唔喜歡買飲食舖位。據中原潘志明講，早幾年市道興旺，業主怕舖位一旦成為飲食舖，租客類別就會被局限，而酒樓裝修貴，一般承租年期較長，業主想加租或租畀新客相當困難。但𠵱家市道不景，以往的缺點全部都變成優點，飲食舖位一放出去，好快就被同行承接，租金重唔使點大減，已成為收長線投資者新寵兒。
好似上月尾投資者馬亞木以1730萬元，買咗西環前金塘酒樓舖位，唔夠一個月就以月租十八萬元租畀中國大酒樓，回報率12.5厘。類同例子重有八月尾投資者以1880萬元購入觀塘廣場十五樓，九月中以二十四萬元租出，租金回報率15.3厘。
長實嘅紅磡超高豪宅海名軒，繼續傳出成交消息。利嘉閣地產海逸豪園分行經理王雪梅同蘭西講，啱啱做咗單1座高層A室，面積2172方呎，成交價近千六萬，呎價7366蚊。
王雪梅透露，買家係非上市公司集團股東，指明要睇海名軒。先後睇過三次樓，最初聽到個價錢，反應係「好貴」，但睇多兩次之後，有感全海景單位難求，加上發展商又減咗些少畀佢，計完一輪之後，就扑鎚買嚟自住。
蘭西
電郵地址：