已故歌聖羅文嘅主診醫生廖家傑，當選今年十大傑青。原來今年評選委員首席成員係現任教統局局長李國章，佢係醫學界前輩，又係中大醫學院老大哥，港大醫學院代院長梁憲孫噚日對八方話，能夠有同事得到李局長賞識，真係好榮幸，實在語帶雙關。
點解咁講？原來廖家傑喺遴選期間一直以為自己死梗。當日面試，李局長問佢「你喺國內搞預防肝炎，咁對香港又有乜用呢？」廖家傑認為香港同內地關係咁密切，咁多人喺大陸有家室、有工作，如果大陸冇咗肝炎，對香港一定有好處。就係咁，廖家傑就當選咗喇。
其實港大內科學系真係好威水，廖醫生已經係該系嘅第四個當選傑青，以前腦科醫生謝勝生、梁憲孫教授同心臟科嘅劉柱柏醫生都攞過呢個獎。
傳真︰2623-9278
電郵︰