近日見到街市有我最鍾意食嘅桃駁李，老闆話呢啲桃駁李來自花旗國，呢個時間夠晒靚，肉質又爽甜，食完飯歎番個簡直係人生一大樂事。
近日行過生果檔，我陳師奶見到有款叫冬棗嘅生果，問老闆佢係乜東東，原來係新鮮嘅紅棗，夠晒滋補。呢啲冬棗來自山東，入口爽脆鮮甜，不過唔好好似我個化骨龍咁唔小心，吞埋粒核落肚呀！
行過菜檔，見啲蘿蔔幾靚，諗起老公鍾意食蘿蔔糕，於時買斤返屋企整底畀佢食。老闆話揀蘿蔔最緊要重手，而且顏色要均勻，各位師奶收到未！
近日啲蓮藕都幾靚，揀蓮藕最緊要睇下蓮藕嘅節，啲節愈長就代表愈爽，而節短就較粉，至於鍾意食粉定爽，就視乎個人口味嘞！