近排如果大家有留意娛樂消息的話，相信都應該知道陳曉東最近購入咗一部法拉利360Modena作座駕，雖然此車秉承有法拉利嘅高性能跑車傳統，但代理新近引入嘅575MMaranelloF1就更具吸引力；新車不但以流線型車體示人外，一台5.8公升V12引擎所迸發出嘅515匹馬力，匹配一套6前速F1半自動波箱，可予人有更高層次嘅駕駛樂趣！相信不少車迷會俾呢位「殺手」迷倒之餘，日後若果在公路上見到佢出現的話，緊記要讓路喇！
記者：黃凱穎 攝影：陳偉強
ImageGirl：Irene
喺外觀上，全新575MMaranelloF1與原有550Maranello十分相似，同樣以高性能跑車應有嘅流線型車體示人；但當大家細心留意下，不難發覺前者嘅頭燈、頭泵把及車頭擾流器等部份都被廠方修改過，加上設於頭冚嘅生風導入口、前輪後方嘅透氣柵格，以及四輪大口徑18吋跑車胎軨組合，重有法拉利專用紅色嘅車身色調配襯，一份高性能跑車韻味，實在係筆墨難以形容。
甫打開車門，一雙以高級真皮鑲嵌兼附有多段調校嘅跑車座椅，就會呈現喺你眼前，不但用料有唔錯嘅手觸感外，坐落去重有一份靠貼舒適嘅享受；中控台上亦有齊各項設備，例如原廠恒溫冷氣、高級6碟CD音響等等，而鋪排亦見簡潔有序，用落重好方便㖭！另外，當然唔少得重有雙安全氣袋，以確保車上乘客安全啦！就連新車嘅表板亦經過改動，引擎轉數表被改置於中央位置，以求讓駕駛者可更清楚掌握引擎轉數去轉換波檔呢！
呢部新款575MMaranelloF1，係以一台5.8公升V12引擎作動力核心，動力輸出數值有所增強，而輸出表現亦較原有550Maranello一台5.5公升引擎來得平均，匹配一套6前速F1半自動波箱連軚盤轉檔推桿，不但令性能表現可有更出色表現外，同時亦可增添一份有如操控手波車嘅駕駛樂趣。另外，新車懸掛亦備有Sport及Comfort兩種模式選擇，而且更與一套F1半自動波箱連接起來，當中如果選擇Sport模式時，懸掛設定及波箱表現會變得跑車化，而Comfort模式就會以舒適為主，以切合不同駕駛者同埋路面需要㗎！
昭哥：直路表現夠勁
擁有多年駕駛法拉利經驗，但不願上鏡嘅昭哥表示，575MMaranelloF1嗰台5.8公升V12引擎馬力達515匹，直路上可超越任何一款法拉利跑車；但由於新車係以舒適駕駛出發，同埋車重較360Modena為高，故此起步反應會較後者弱，不過第3檔後就會遙遙領先。
昭哥又表示新車所用嘅係第3代F1波箱，特別係慢車時表現會更好，所以一般駕駛時用上Comfort模式，舒適程度十分高；當用上Sport模式，整套電子懸掛、引擎及波箱表現都會變得跑車化，揸起上嚟特別好玩㗎。
Irene：顏色搶眼又舒服
至於ImageGirlIrene就話，呢部575MMaranelloF1用上法拉利嘅專用紅色夠晒搶眼。乘坐舒適度亦比任何跑車來得舒適，性能重一啲都唔差㖭；但最後佢笑說：「雖然我好鍾意575MMaranelloF1，但二百幾萬嘅車價對我嚟講實在太貴喇！」
引擎：5748ccV12
馬力：515ps/7250rpm
扭力：60.0kgm/5250rpm
傳動：6前速F1半自動波
懸掛：（前）雙搖臂（後）雙搖臂
制動：（前）透氣碟（後）透氣碟（ABS）
輪胎：（前）255/40ZR18（後）295/35ZR18
尺碼：4550×1935×1277mm
軸距：2500mm
車重：1730kg
0-100公里：4.2秒
極速：325km/h
新車售價：$2,668,000
車輛提供：勵駿汽車（28080978）