美股周一晚雖大升逾二百點，不過投資者噚日睇住日股大跌，都不敢過份造好，港股反反覆覆又一日，收市報9548，跌21點，成交不足48億元。
不過，周一跌近5%的東亞（023）就逆市反彈3.3%，收14元。近兩日成交金額銳降近半，Cookie話除咗投資者注意力轉移至渣打（2888）及中電信（728）抽水活動外，亦由於盈富基金（2800）售罄，相關的對沖活動已經完成，所以成交突然大縮。若情況持續，港交所（388）盈利前景真係不堪設想。
中策（235）等洽售成報傳媒（8010）股權予陽光文化（307）一事，已經告吹。黑客話，聽講Charles叫價過高，所以傾唔成。現時經濟低迷，傳媒事業難做，利潤有限，陽光文化縱使想發展為多元化媒體企業，但亦不會出手過於闊綽。
超大（682）噚日晨早停牌，市場傳出可能夥拍英資分銷商組成合資公司。不過，組合資公司是平常事，使唔使停牌呀？
黑客話，聽講今次停牌係同盤數有關，最近歐亞（932）事件令核數師心理負擔大，因此對民企盤數特別緊張，相信民企與核數師之間好易產生爭拗。不過事件對民企股冇大影響，格林柯爾（8056）勁升8.3%，收報0.65元；大成生化（809）則跌3.1%，收1.88元，成交446萬元。
最近財爺突然宣布公務繁忙，本周不會上京，市場即時傳出政府會有大動作或好嘢公布。不過港府隨即否認。阿虎覺得可能真係財爺本身工作太忙不上京，市場反應過敏而已。
阿虎