做人嘅嘢梗有高低潮，世界盃之前我哋嘅范大將軍范志毅可以話幾順利，之不過國足喺世盃衰咗之後，佢嘅運氣亦跟住下滑，蘇超鄧地唔愛佢外，到𠵱家重未有班落，俾孫繼海同李鐵兩個師弟搶晒鏡……
但開港有話，否極泰來，范大將軍近日畀英甲球會基寧咸睇中，已經開始試腳，為期兩個禮拜。基寧咸搵佢嘅原因，係佢踢水晶宮時已經令基寧咸印象深刻，國際賽又豐富；如果今次掂嘅話，佢可以第三度勇闖英倫，真係不屈不撓，精神可嘉，係中國人之光，我求大俠呢兩個禮拜都會祝福佢。
史比維爾噚日控告《紐約郵報》誹謗，要求賠償四千萬美元。該報之前踢爆史比維爾右手受傷係因為同人爭執時，揮拳撻Q打中牆所致，紐約人高層更因此罰咗史比維爾近四十萬美元，所以今次佢死都要拉埋《紐約郵報》嚟陪葬。我求大俠雖然唔知邊個講真話，但係史比維爾要求賠四千萬美元似乎太過離譜，即係迫虎跳牆，迫對方死都撐到底！
英國網球手漢文上周啱啱榮升做老竇，佢老婆露絲同佢生咗個女，博彩公司威廉希爾立即開出盤口，以二百五十一倍賭佢個女會成為溫布頓女單冠軍咁話。雖然個盤口好吸引，但我求大俠就相信，漢文奮鬥咗咁多年都係打入溫布頓四強四次咁多，男單冠軍都係緣慳一面，講笑計血統睇怕佢個女都唔叻得去邊囉。
喺李斯特城出身嘅前英格蘭國家隊長連尼加，睇到球隊今屆降落甲組後，𠵱家欠債二千八百萬鎊，於是自己攞咗一百萬鎊畀球會，重講明自己唔係要做球會董事，更加冇諗過可以攞番啲錢，只係想令呢隊波繼續存在……呢一百萬鎊雖然係杯水車薪，但係可以睇到人間溫暖嘅一面，連尼加，你不愧係我求大俠一直以嚟嘅偶像。
新星朗尼原本今日十七歲嘅生日禮物係愛華頓畀加人工嘅合約佢，點知半路殺出個程咬金杜格利殊，佢打敗咗朗尼嘅經理人，將朗尼搶到手，以後一切有關朗尼出場同簽約嘅嘢，都由杜格利殊做董事嘅Pro-Active管理集團負責。杜格利殊果然有眼光，而且做嘢快手快腳，抵佢發！唔使講朗尼嘅收入將會較愛華頓之前講嗰個周薪一萬鎊嘅數更多，朗尼今次真係發過豬頭囉。