美股有美股急升，港股有港股唔跟。恒指先升87點，然後反跌62點，最後微跌21點。股隻好個別發展，聯通（762）續升10仙，中移動（941）則回落30仙，收20.10元。
中移動守住2字大關，有機會追番失地，跟聯通做番好啲，佢嘅Call輪，短敲多少無妨。最值得落注嘅係9532，明年3月到期，現價20.2仙，溢價11%，槓桿率10倍。較9532稍遲到期嘅9468，槓桿率差好少，但溢價高2.6個百分點，9532拍埋去，靚好多。中移動另外1隻Call輪9437，現價10.5仙，槓桿率19.1倍，爆炸力勁啲，但壽命同溢價，輸蝕過9532，唔係咁啱落手。
長實（001）同和黃（013）雙雙逆市而升，大市個底轉番好啲，大勢估計係反覆上升，或就咁反覆，上完又落，落完又上。長和走勢估計亦係反覆，或者跑贏大市少少。
吼住長和回落之時，揸啲相關Call輪。長實輪離唔開9515同9517呢1pair，明年2至3月到期，溢價同槓桿率差唔多，買賣最易係呢兩件。和黃輪則離唔開9516同9518，呢兩件最正路，溢價12%左右，槓桿率12至13倍。有隻和黃輪9477溢價同槓桿率都大啲，波幅自然亦大啲。
章盛