美國女歌手ChristinaAguilera自從改行冶豔路線之後，形象愈嚟愈出位，早排佢為咗谷新碟，幫MTV電視台拍攝音樂特輯，重玩埋露乳環益街坊㖭！
話說MTV台早排貼身追擊Christina一日，幫佢隻碟宣傳，咁啱Christina為咗配合新碟嘅名稱《Stripped》，當日要半裸影唱片封套，喺拍攝期間Christina當然係半裸上陣啦，休息嘅時候佢重唔着衫四圍走，不知幾咁豪放，結果MTV電視台梗係拍低晒啦！今次Christina喺螢幕上首次露點，重俾人發現原來佢兩個胸都穿咗乳環！
其實Christina早排喺新歌《Dirrty》嘅MV入面，已經挑戰電視極限，唔止做出大堆挑逗動作，重俾成班男dancer任摸，大玩不文，搞到幾個國家要禁播。計我大口羅拉話，其實Christina已經到咗走火入魔嘅地步，唔知佢係咪嫌扮玉女唔夠BritneySpears鍊，所以要轉型招攬一批麻甩fans呢？