港股大成交升咗5日，噚日突然回復平靜，成交即刻大縮，搞到小初有啲失落。經紀黃話，唔使冇心機，可以留意吓海爾中建（1169），近日走勢靚番晒。
小初睇落又覺得幾對辦，隻股噚日最高見14.5仙，收14仙，升7.7％，不過成交就奀啲，只得616萬元。
經紀黃話，自從有人同大陸方面講掂數後，股價雖然較以往高位仍有一大段距離，有排都未見家鄉，但基本上都叫做企硬唔再跌，跟住海爾集團首席執行官張瑞敏話，正向國務院申請注入內地家電資產，藉此取得海爾中建嘅控股權。自此之後，海爾中建股價就開始向上升，擺明轉勢。
此外，由於海爾中建發新股收購中國流動電話合營企業15％權益，海爾集團持股量大咗，令公眾持股量唔夠25%，公司講明會在11月1日之前回復25%最低公眾持股量，呢一點亦係股價企硬嘅原因。
慕容小初