狙擊手題材雖非大路橋段，不過始終都有唔少愛好者支持，如荷李活電影或電子遊戲都有相關題材，主要原因係狙擊手過人嘅冷靜同耐性，務求一擊必中，甚有英雄感。KONAMI喺街機同家用機上不斷推出狙擊手遊戲《SlientScope》，新一集《SlientScope》同樣繼承超高難度玩法，好似要訓練玩家成為全職殺手咁。
記者：徐影龍
攝影：朱崇德
《SlientScope》系列本身屬街機槍擊遊戲，不過因為受歡迎關係，所以每集都會移稙至家用機內，其實狙擊手玩法並非《SlientScope》首創，之前已有一款《辣手13》，同樣賣高難度，不過每關攻略目標較簡單，通常都係要求一粒子彈達成目標。而今次《SlientScope3》就將難度更為提升，敵人出場數目眾多，每個都身處極遠方，若射失的話重大鑊，因為會驚動更多敵人出現，對「一擊食胡」嘅狙擊手嚟講的確係一個考驗，尤其係面對首領級敵人時，攻勢倍添猛烈，又火箭炮又機關槍，中期舞台甚至要對付一堆會發炮嘅直升機㖭，夠晒變態。
幸好遊戲並非必須「一擊中頭」，射中身體各部位如手、腳等已可將普通嘍囉殲滅，若能做到HeadShoot，等級認證會有所提升，亦可做到一擊殺滅首領級敵人，所以眼界都好重要。
呢次《SlientScope3》PS2移植版，同樣唔對應光線槍，只以Analog手掣作操控，投入感當然比街機版遜色。遊戲包含兩大玩法，尚算充實，第一個係跟足街機版本嘅「狙擊」玩法，以任務形式作攻略，每關時間及敵人數目都較少，勝在每次都有唔同分支，要打爆好多次機先玩得晒。
另一個玩法就名正言順為「SlientScope3」，屬家用版獨有模式，並非單單改改劇情同敵人，而係身處一個廣大地方，消滅大量敵人，如初段嘅貨櫃碼頭，便足足要消滅幾十個人，最特別係加入方向系統，敵人會從四方八面攻過嚟，玩家需不時轉換視點搵出敵人，否則分分鐘背後猛咁中槍都唔知發生咩事，可算係街機版嘅延長玩法。
1﹒《SlientScope3》支援USB滑鼠操作，好處係準星可快速或微調移動，又唔會出現手震情形，滑鼠左、右鍵已足以操控全隻Game，的確比手掣好用。經筆者測試，發覺電腦用嘅USB滑鼠全部都可對應使用，就算光學滑鼠都冇問題，機迷唔使買PS2專用滑鼠咁嘥錢。
2﹒雖然《SlientScope》系列出咗名難玩，不過今次測試過家用版，發覺瞄準時總有點「AutoTarget」功能，毋須每次瞄到準先開槍，玩家大可利用呢點，在面對眾多敵人時毋須逐個按掣ZoomIn，當紅色準星叠住綠色目標便可開槍，命中率極高，新手宜盡早掌握呢個特性。
(C)19992002KONAMI
售賣點：DreamStore
地址：灣仔東方188商場256舖
電話：25753285
「喺街機不嬲都有煲開槍擊遊戲，自問都有啲心得，不過面對呢隻《SlientScope3》就較有挫敗感，因為有別過往槍擊Game猛咁射嘅大原則，最緊要係眼定同手定，唔多習慣，不過由於家用版唔使鋪鋪入錢，愈係難玩我愈要挑戰，直到爆機為止！」
「玩呢隻Game時個心要夠定，事關敵人出現位置個個唔同，一下失手只會引嚟更多敵人，需要相當冷靜，但又唔可以瞄準太耐都唔射，否則會出現總統被射殺、人質被殺等結局，只求殺敵爽快感嘅玩家就唔多啱。」
今次KONAMI一口氣推出PS2及GBA移植版，實行大小通吃。起初對GBA呢隻《SlientScope》不存厚望，始終手提機仔功能有限，不過實際試玩過後，發覺表現比想像中好得多，遊戲能保留濃厚嘅狙擊Feel，畫面及BGM理所當然唔可以有咩要求，不過要彈係任務始終唔夠多，好快打爆機。值得一提係支援四人連線對戰，兼且一餅帶加對打線就玩得。連線對打玩法就較為簡單，眾玩家需鬥快擊落唔同顏色嘅氣球，人多一齊玩時氣氛好正。
對應機種：PS2
遊戲類型：射擊
遊玩人數：一人
開發商：KONAMI
售價：$330