曾經係美國樂壇天后嘅瑪麗嘉兒（MariahCarey），早排一度淪為失業天后，雖然𠵱家有唱片公司接收咗，但今時唔同往日，𠵱家佢已經唔可以淨係靠個名賣碟。
最近我大口羅拉收到料，話佢搵咗'NSync靈魂人物JustinTimberlake一齊錄咗首新歌《Yours》，呢首歌重好有可能收錄喺瑪麗嘉兒十二月十日推出嘅大碟《Charmbracelet》入面。
為咗幫新唱片公司Island/DefJam打響頭炮，三十二歲嘅瑪麗嘉兒當然要操弗自己啦，佢早排狂跑步同做運動，主力減佢隻超粗麒麟臂同埋豬腩肉，結果足足減咗成三十磅，以佢身高五呎九吋嚟計，一百二十三磅都算幾標準喇！
回復魔鬼身材嘅瑪麗嘉兒，最近重喺紐約為佢首勵志新歌《ThroughTheRain》拍咗一個濕身性感MV，乘機大騷本錢。講番MV個內容，其實係講七十年代一對唔同種族嘅情侶嘅遭遇，據講意念係喺瑪麗嘉兒已故嘅非洲裔父親同愛爾蘭裔母親身上得到啟發㖭。