天王級歌手同性感女友拍咗幾年拖，成日離離合合，次次分手都係因為女方發現男友成日走去識其他女仔。其實天王級歌手都好鍾意性感女友，如果唔係都唔可以好咁多年。
其實好多男人都多心嘅，天王級歌手鍾意出外搵食已經唔係乜嘢秘密，不過每次都俾女友知道，之後就嗌大交分手收場，不過每次分開冇幾耐，佢又會死死氣去𠱁番女友。
點解天王級歌手對性感女友咁難捨難離？聽講係因為性感女友喺溫柔鄉度，令到佢好冧喎！其實要佢只對一個女人忠心係好難，不過為咗唔想性感女友唔高興，天王級歌手偷食亦會盡量小心，而佢女友亦喺周圍滿布線眼，搞到近年嚟男方要識女仔都唔係咁容易。
楊紫瓊大前日同男友鍾再思一齊返馬來西亞老家，佢哋噚日下午返咗香港。雖然楊紫瓊同鍾再思係公開嘅情侶，但佢哋噚日喺香港機場抵港大堂時，一見記者即刻自動彈開，唔想俾人影到合照。
楊紫瓊好似好攰咁，佢只係話自己喺大馬返嚟，然後就冇乜嘢講，鍾再思就話私人嘢唔講，然後就行咗去。人哋偶像藝人怕影響形象先怕人影情侶合照啫，唔知楊紫瓊呢類實力派藝人怕乜呢？
無綫今年節目巡禮，有一套新古裝劇《楚漢驕雄》搵咗鄭少秋同劉松仁拍宣傳片。
秋官噚日喺電視城試造型，佢話最怕就係黐鬚，成日搞到爛嘴，佢又話：「最慘係片商唔肯買套劇，佢哋唔信我做奸，我真係驚佢哋唔肯買㗎！」
天后歌手同年輕偶像分手之後，佢啲老友話其實天后都幾懷念呢段情，因為以前佢兩個喺埋一齊嗰陣都幾甜蜜，天后成個人都青春晒，成日喺男友面前撒嬌。如果年輕偶像唔係一次又一次對佢不忠，天后根本唔捨得同佢分手。
李彩樺（阿Rain）雖然同「飛魚王子」方力申（Alex）傳過緋聞，但佢都封咗方力申做偶像，阿Rain話對足球同籃球都冇興趣，但係佢成日都游水同行路。阿Rain話：「我游嘅係唔正統嘅蛙式，見到Alex游自由式同蝶式咁叻，都覺自己好小兒科。」
梁敏儀噚日去九龍灣，出席新片《千機變》嘅開鏡禮。佢曾經話改行打女路線，但係好奇怪，今次佢喺呢套科幻動作片入面，竟然冇分打，淨係行性感。
梁敏儀話啲戲服有露背又有低胸，咁又係嘅，啲女主角唔露，就梗係要靠吓啲惹火嘅配角啦，咁套戲先更有睇頭嘛！