萬眾期待嘅新一代本田Accord，終於喺本月中響日本本土正式推出，並備受各界車迷好評，而頂級跑版嘅EuroR型號，亦將於今年年尾登場；新車除與其他型號一樣，擁有全新造型設計之餘，引擎動力輸出亦見強勁，定能滿足一班追求高性能表現嘅車迷。唔知香港各大獨立車行，有無興趣將之引入呢？
正如引言所述，新版AccordEuroR與其他型號一樣，擁有全新設計嘅造型，令吸引力大增之餘，廠方更特別為其裝上頭尾泵把連整流器、車身兩側裙腳、蜂巢式鬼面罩，以及四輪17吋跑車胎軨等等，以保持原車一份跑車神髓。車廂布局亦經過重新設計，除以簡潔實用為大前提外，一雙前排更用上Recaro桶椅配搭，乘坐妥貼舒適，Momo三幅式跑車軚環亦能予人有不俗嘅把持感，當然唔少得重有鋁合金波棍的同埋跑車腳踏啦。
新車則以一台2.0公升i-VTEC引擎作動力核心﹙馬力220ps，扭力21.0kgm﹚，除有慳油好力嘅特點外，而且重有低廢氣排放量嘅好處；而響6前速手動波箱輔助下，可有助增強性能表現，起步加速都要較前來得敏捷順暢。同時，廠方亦強化咗新版AccordEuroR嘅底盤及懸掛系統，從而令新車可有更出色嘅循迹表現呢！