歐洲球壇響過去兩個禮拜殺到天昏地暗，連阿仙奴同皇家馬德里都頂唔順斷纜，惟獨AC米蘭跑贏大市，幾乎長戰長勝。咁重唔止，佢哋重攞到踢波嘅終極成功──作客贏完阿特蘭大四個一皮後，精采到連對方球迷都拍爛手掌，連我求大俠都要寫個服字。
AC米蘭教頭安察洛堤就話：「我最滿足係完場時得到對方球迷歡呼喝采。」如果睇盤路佢哋重勁，因為啱啱呢一輪英、意、西、德聯賽，能夠作客讓盤而得手嘅球隊無幾多隊，AC米蘭就係當中贏得最輕鬆一隊，搞到大家幾「happy」。查實佢哋陣中過半數主力最近都征戰頻密，情況唔好得過皇馬幾多，今次證明隊波夠鬥心，過去幾年嗰隊AC衰波，唔會再有人記得嘞。
歐冠盃戰火重燃，之但係國米嘅簡拿華路、列高巴、曼聯嘅雲尼斯達羅、利記嘅謝拉特同埋華倫嘅安馬爾（名單太長恕難盡錄）等球星都因傷踢唔到呢輪比賽，有啲強隊重寸，好似幾乎出硬線嘅皇馬就講明收起魯爾、費高同埋施丹，費事踢殘喎。睇怕呢輪比賽都係唔好盲捧強隊嘞……。
曼城輸完一場又一場，重場場大大鑊，季前誇下海口要力爭前六名嘅領隊基瑾，最近梗係無聲出啦；而曼城球迷都好唔滿意，不斷抨擊隊波，但係我大俠老友孫繼海依然好評如潮，成日響啲比賽評分選舉中當選曼城最佳球員。最近就有曼城球迷講：「如果我哋有十個孫繼海就好囉。」
愛華頓十六歲仔朗尼響上周六省爆阿仙奴，破對方三十場不敗身，呢一腳就犀利囉，經此一役佢身價倍增，而愛華頓打算將佢周薪由原來八十鎊加到一萬鎊，足足加咗百幾倍，真係恨死隔籬。不過呢位小朋友好識扭計，啱啱轉咗經理人，據聞最快要十二月至會同會方傾新合約。唔通想吊高嚟賣？
皇馬響上個禮拜六失身俾桑坦德後，隊長希亞路就話知隊友係乜球星，照鬧佢哋決心唔夠，真係勇氣可嘉，有真大佬本色。另一邊廂巴塞響禮拜日輸俾華拉度列期間，法蘭迪保亞就學希亞路鬧新人費納度，衰在佢掛住鬧人幾乎失位，結果要費納度推佢提醒番佢補位。我求大俠覺得呀法蘭兄你想扮大佬唔係唔得，顧掂自己先啦。