容祖兒（Joey）昨日本與3T小花之一的劉思惠，到清水灣拍攝~H2O+廣告，但因天雨關係而取消，Joey其後到商台接受訪問。Joey的師傅羅文於上周五逝世，她昨日透露自己當時正身處香港機場。
Joey說：「我嗰日喺台灣返香港轉機去上海，由於班機延遲，咁我就喺櫈上面瞓着咗，之後我發現有一個未接來電，如果我一早覆電話嘅話，我一定會離開機場去見佢。後來我喺電話度就同師傅（羅文）講好多謝佢咁錫我同埋教識我咁多嘢，之後就同佢講拜拜。我只係聽到佢嘅呼吸聲，我諗佢當時都好辛苦，因為佢堅持咗咁多個鐘。」
原來羅文生前曾向Joey透露，入院一次比一次辛苦。
Joey說：「師傅佢好叻，雖然佢瘦到連牙都哨埋，但係佢喺我心目中永遠係好靚嘅。佢成日都唔肯瞓，佢話瞓咗就好似冇嘢做，所以身邊所有人都為佢好心痛。師傅重成日喺人面前讚我，有時佢見到我，就會話我唔肥，兼且叫我唔使減肥，所以我去到佢屋企一定會大魚大肉，我出席喪禮時一定會帶佢最鍾意食嘅鴨舌同花生糖畀佢。」
而Joey更表示為了不辜負羅文的教導，一定會盡力做好所有工作，她說：「因為師傅鍾意人哋成績好，我係佢學生，如果我有好成績，佢都會自豪。」
採訪、攝影：李珮洳