海外車訊：
打開天空褔士BeetleConvertible

一眾「甲蟲」迷期待已久嘅新版BeetleConvertible，廠方終於響日前公布咗關於佢嘅詳細資料，並宣布會響明年首季正式推出；新車除保留有原車既圓渾且Cute嘅造型外，開關需時甚短嘅電動軟篷頂亦係賣點所在。今日不如就趁新車未正式推出前，一齊嚟先睹為快，睇睇呢隻「開頂甲蟲」有何吸引之處啦！
記者：鄭達基

電動軟篷開關容易
為保留原來Beetle嘅神髓，故廠方並無為新車響外形上作出太大改動，依舊以圓渾造型設計示人；相信最大改動就係由硬頂，改為電動軟篷頂設計，而篷頂更可於13秒內完成開關程序，可謂十分方便。同時，廠方亦提供有多種全新車身顏色，如AquariusBlue、MellowYellow及HarvestMoon等等供用家選擇，以滿足不同要求。

車廂闊落舒適為首
然而，新版BeetleConvertible嘅車廂空間仍見寬敞闊落，前排椅背收摺功能亦經過重新設計，從而令後排乘客進出車廂時變得輕鬆又容易，當然唔少得重有承托力甚豐嘅座椅配搭啦；表板布局亦無太大改動，但前排嘅杯座亦經過重新編排，變得較前就手易用。另外重可以加設風擋，以減低行車時亂流吹亂頭髮嘅機會㖭。最重要嘅係，車內除設有安全氣袋外，後排頭枕更會響翻車意外時彈出，以保障乘客安全。

底盤穩紮循迹性強
機械配搭方面，廠方亦無特意為其進行強化，因為Beetle本身嘅底盤設計經已係十分出色；加上有由前輪麥花臣支柱，及後輪扭力連桿所組成嘅懸掛系統輔助下，可有助增強路面循迹性，而四輪碟式制動，加上多套電子系統（如ABS等等），亦可予人有收放自如之感呢！動力配搭則用上一台2.0公升直4引擎（馬力115匹），運轉寧靜又暢順之外，匹配一套5前速手波或6前速自動波箱，更能令性能表現發揮得淋漓盡致㖭！

葉璇　容祖兒也愛「甲蟲」
硬頂版新款福士Beetle自在港推出以來，一直備受年輕車迷追捧，就連紅得大紅大紫嘅歌手容祖兒，同埋人氣急升嘅演員葉璇都係「甲蟲」擁躉㖭！唔知佢哋閒時會否約埋坐低飲吓茶，一齊傾吓「甲蟲」經呢？