好耐冇碰見過地產黃，呢日偶遇，自然講番兩句好話，恭喜佢哋得到特首祝福，地產有救矣。地產黃眼仔睩睩：「救乜嘢，效果重未見到噃，特首加松哥出完口術，都唔見有實質行動嘅？」
地產黃呢幾個月做經紀賣新樓盤，叫做搵到食，但佢話賣新樓盤要發展商花好多腦汁，大打心理戰，先至能夠一Q清袋，用少啲力都唔掂，所以佢認為地產市場頂多都係積累緊購買力啫，未算有轉好迹象。
問到地產黃：「點樣打心理戰？」地產黃話：「要做好多準備工夫㗎，樓盤開賣前嗰幾日，樓神L就四處拜訪地產代理做roadshow，軟銷硬銷口頭出齊，拍晒我哋膊頭，令我哋飄飄然，嗒晒糖；跟住出第二招，聲言重重有賞，佣金高，畀錢快，一定唔拖數，快夾準㖭，你知啦，我哋素來都睇錢份上，樓神識晒我哋心理，我哋梗搏命；第三招，上千名經紀施盡渾身解數，班齊人客到樓盤，用橋留住佢哋幾小時，刺激情緒，之後樓神就叫我哋入房，用A4紙寫手諭，十八樓B座，問我哋邊個要，嘩我哋已經餓咗好耐，梗係去搶啦，我搶到之後，擒擒青走番去我堆客度，大聲嗌：陳生，我搶咗一個單位畀你，要唔要？當時環境氣氛緊張，陳生點會話唔要吖，佢驚隔籬黃生李生要吖嘛。於是我帶佢入去買樓，其他人睇到眼定定，再隔幾分鐘，樓神又下手諭，十九樓D，嘩搶到飛起，人群哄動，最後人人都唔理得咁多，逢單位都搶，你話樓神好唔好嘢呢，直情係賣樓天才！