羅文於上周五晚上十一時十五分病逝，但當日下午一時許，商台主持查小欣已在節目內宣布羅文的死訊。查小欣昨日在節目內表示該錯誤消息是經楊受成證實，而楊受成昨日亦透過查小欣的節目公開道歉，而查小欣更哽咽說：「我喺度重申，冇怪過任何人。」
羅文於上周五（十八日）晚上十一時十五分於瑪麗醫院病逝，不過當日下午約一時，商台主持查小欣於《茶煲裏的查篤撑》節目內，竟宣布羅文死訊，因而鬧出軒然大波，被指胡亂發放消息。
昨日查小欣在節目內解釋，指有關誤報羅文的死訊是經楊受成證實，言語間暗示自己亦是受害者，她並找楊受成接受訪問，楊受成在節目內公開為今次事件道歉，但他透露消息來源其實是來自羅文助手阿東。
查小欣在節目中說：「我當日喺一點二十分左右收到突發消息，就係話羅文去世，於是就喺節目講咗出嚟，當時我話得到英皇娛樂集團主席楊受成先生嘅證實，而楊生都有嘢想講番，想向大家講句對唔住。喺呢件事上，我冇任何怨言。」
其後楊受成接受節目電話訪問時說：「當時係下午一點，我約咗俞琤食飯，阿東喊住打畀我話：『老闆，老爺走咗啦（指羅文已病逝），你快啲嚟醫院啦。』Winnie（俞琤）聽到消息後就打電話畀鄭丹瑞，鄭丹瑞就打畀你（指查小欣），之後你就打番畀我，係我親口證實嘅。」
楊受成續說：「當我去到醫院見到羅文，佢重有氣㗎，我問阿東點解同我講啲咁嘢？佢話：『我當時好亂，唔知自己噏乜。』跟住佢就係咁喊。阿東當時好亂，醫生唔係擔心羅文，係好擔心阿東。如果羅文有事，我哋最擔心阿東。」
對此查小欣說：「喺一點出咗呢個消息之後，其他電子傳媒都出呢個消息，引起一場誤會，咁大家都道歉啦。」楊受成聞言即說：「我自己都想道歉，呢件事我都有啲鹵莽，因為阿東講咗之後，我都冇再去求證，我都好想道歉，對唔住！」
最後查小欣更哽咽說：「我喺度重申，我冇怪過任何人……」未幾查小欣已說不出話來，其拍檔主持即替她打圓場，讓她平復心情。