「我哋要隨天而行，只要夏天做好啲，冬天就會好易過！」表明了糧船灣海鮮餐廳內兩姊妹望天打卦的心情。每年六月至十月，是最多人到糧船灣的季節，她倆都做到停不了手；天涼後，生意減近九成，但她們還是用上最靚海鮮做好每一碟餸，希望留着食客口味，下一年回頭幫襯。
記者：梁佩芬
攝影：陳穎
糧船灣有利海鮮漁村
地址：西貢糧船灣東丫
電話：27925087 (必須訂座預約)
營業時間：10:00am-10:00pm
付款方式：只收現金
遊人口味
由鄭氏家庭經營的「有利海鮮漁村」已有三十年歷史，是糧船灣第一間食肆。姐姐鄭美玲，妹妹鄭美娟，在西貢糧船灣土生土長，十年前曾出市區工作，但從未習慣城市人每日趕車趕食趕返工的日子，而且空氣侷促又人多車多，與糧船灣的純天然景色、人煙稀少及優閒生活相比下，三年前一齊離開煩囂的城市，返回老家助老父打理舖頭。美娟說：「以前，返工一放假，就一定返糧船灣。加上以前做會計成日困喺寫字樓內，同由細到大生活喺陽光與海灘相比，都係一種『酷刑』。」
「始終自己生意都要親力親為，爸媽年紀大，又成日有外國人幫襯，我哋點都要幫手；而且家庭式生意可以自給自足，無掣肘，無論菜式、價錢、味道及環境都可自把自為，又點可以同打工相提並論？」美玲補充。
過了十月，天氣轉涼，風浪又大，開始少人出海，靠海維生的兩姊妹，開始面臨幾月都無生意做的境況，如果想冬天到訪海鮮檔，就一定要預約，免得摸門釘。可能是水上人要與自然為伍的傳統，她倆覺得這是定律：「正所謂好天斬埋落雨柴，都係靠夏天嘅生意為主；秋天後，首先會入少啲海鮮同汽水，用水用電又少啲，支出少咗收入減半都唔會太難過。況且，只要一星期做到兩三日生意，回本都唔成問題。始終係家庭式生意，賺多少都無所謂。」
當問及夏天旺季過後的半年悠閒生活會點過時，原以為她們會周遊列國，原來是「瞓覺、打牌、裝修舖頭、整埋爐頭。」更神奇的是，除了夏季外，她們最忙的日子是農曆新年前。
「好多人都叫我哋做年糕，用傳統水上人嘅手法炮製，年糕可放成年，好多客人都Order十多二十個，送禮自用都得，所以一踏入臘月就開始忙到年二十八，真係可以過一個肥年。」
兩姊妹雖然先後往廚藝學校學廚，主要想了解一些新的烹調方法，但最終還是採用同樣是水上人的媽媽祖傳秘技，特別注重保持海鮮獨有味道，煮前不會醃食物，只加油鹽水用蒸、燜、煲方法炮製。
紅蟹及海蟹$160?斤花蟹$98?斤
未煮前的雄海蟹是藍色的，雌性是綠色，但貨量不多，最好預約。蟹常在西貢內海與大浪搏鬥，肉多於膏，肉不滑有咬感但無味，用薑葱煮可補不足。
白灼鮮魷$58?碟
水上人一向食得清淡，但又最拿手做辣酒，尤其入秋後，加兩羹吊味使人更加開胃。鮮魷爽身，浸在帶少許酸味的辣酒內，一咬足令半睡不醒你，精神為之一振。
原條泥鯭粥$58
西貢內海釣獲的泥鯭，近五吋長，肉厚有彈性，除去內臟及魚鱗後，原條放入軟綿綿的稀飯內煮五分鐘，成煲粥滿布魚骨，小記建議上枱後即食，因凍後魚會腥。
1.陸路
從西貢碼頭乘的士至北丫，落山靠左至東丫，經過小學及天后廟就到漁村，需時約半小時。
車費：約$90
2.快艇
訂座時可預約在西貢碼頭坐快艇前往，約15分鐘。
船費：約$300，可載3-8人。
3.街渡
每朝早上8時15分於西貢碼頭開出，下午3時30分於有利碼頭回程，單程需一小時航程。
船費：$20。另可租用街渡，約$500一艘，可載約二十人，查詢：91703616（郭太）。