早陣子，三菱代理一口氣運嚟三部高性能Turbo版新車，教人眼前一亮之後，亞Mark聽聞車廠響11月，會推出全新Colt車系，而且今趟重係經由負責平治Maybach嘅設計師執筆，可謂非同凡響㗎！至於新車系嘅對手，會係現時炙手可熱嘅本田Jazz、日產March同豐田Echo等等；新Colt嘅造型會係兩廂式小車圓渾設計，車頭雙聚焦圓燈匹配直立式尾燈組合，時尚有型之餘，加埋一雙門邊電鏡組合，重有點酷似本田Jazz嘅感覺。新車尺碼為3870×1680×1550mm，軸距有2500mm；至於引擎配搭，最教車迷驚喜嘅，會係廠方重新發展MIVEC設計，分別為1.3公升（馬力90匹）同1.5公升（馬力98匹）型號。據知，代理會率先引入1.3公升版本嘅Colt，計有標準同Sport版兩款，定價大概會響11萬上落。以舊有Lancer同Galant配置MIVEC偈嘅高性能表現。相信新款Colt亦潛藏有高性能一面，新車可望年底前或明年初抵港，鍾情細車嘅Fans就要拭目以待喇！