港股累積升幅接近1000點，市場見美股上周五升勢稍為放緩，噚日港股即時有少許腳軟，恒指收9570，跌42點，成交由接近100億元銳降至43億元。黑客話，相信有資金調過去認購渣打（2888），當渣打招股完成後，港股就會再度活躍，到時會炒過。如果係咁，大市有7成機會只係大漲小回。
講開渣打招股，噚日市場未見有資金換馬活動出現，恒生銀行（011）更逆市升1.2%，收85.50元，成交9961萬元，而滙豐（005）亦只不過隨大市微跌0.25元，收報86元。不過，比較奇怪係東亞（023）竟然勁挫4.6%，收13.55元，成交達2841萬元。照計渣打與東亞都唔同班，無理由基金會由東亞換馬認購渣打。
Cookie話，東亞急跌唔關渣打招股事，只不過因恒指服務公司檢討恒指成份股，投資者驚住中銀香港（2388）一旦納入為恒指成份股，可能會踢東亞出局，所以預先沽定先。
今次東亞雖有機會避過一劫，但其市值在恒指內只係排行第23位，就算今次好彩恒指服務公司肯加多一隻銀行股入成份股，毋須硬性規定要剔除另一隻銀行股，但當渣打上市後，日後好大機會成為成份股，到時東亞未必咁好彩。
二三線股噚日各自各精采，但交投稀疏，根本不成氣候，但有利幕後托價進行配股。ｉ師傅話江山控股（295）將先舊後新配股集資，每股作價0.21元，配售2億股，集資4200萬元。此股噚日升5.6%，收報0.243元，不過配完股之後，江山走勢重有冇咁硬就好難講。
阿虎