回歸之後，香港可以感受到英國殖民地「遺風」、扮吓紳士淑女嘅地方已經寥寥可數。馬會仍算係其中之一。但上個馬季馬會發現竟然有人撻住拖鞋着條短褲，於會員席行來行去，甚至出入廂房者，都竟然着牛仔褲波鞋，班董事驚連馬會呢個「最後的堡壘」都失守，於是今個月急急發信畀所有會員，苦口婆心勸大家衣着要得體，雖然可以着整齊嘅便服（SmartCasual），但牛記笠記、背心、T恤、波鞋、工人褲，就會被拒於會員廂房之外。另外，連會員席亦實行比以前嚴格嘅準則，短褲、背心及拖鞋一律禁止。
八十年代時，真係發夢都冇諗過有朝一日，馬會要發信請「尊貴嘅會員」唔好着拖鞋去馬場，奈何Casual係大勢所趨，科網熱潮新貴又刻意宣傳，連楊致遠見阿董都唔打呔。其實所謂SmartCasual，連時裝設計師鄧達智都話小小超I.TLook係一個好示範，一件牛津紡恤衫襯卡其褲就好好睇。另一位設計師鄭兆良話除咗小小超，潘廸生千金DiDi潘楚穎都係着得好順眼，係SmartCasual嘅表表者，馬會會員可以學習學習。
（圖）左起：楊致遠、小小超同潘楚穎都係SmartCasual嘅表表者。
傳真︰2623-9278
電郵︰