港大陸佑堂噚晚非常墟冚，事關五任大學校長濟濟一堂，為本新書推廣。八方同班行家當然唔執輸，一口氣簽足五位，留個紀念。佢哋包括特別遠道回來嘅黃麗松、由新加坡專程返港嘅王賡武、因民調事件下台嘅鄭耀宗、唯一老外校長戴義安以及新任校長徐立之。
大家簽得高興，連出席嘅嘉賓及校友都成為排隊對象，包括鍾士元、余叔韶、廖本懷、陳太、阿松同埋冬冬等。
廖秀冬更不甘後人，攞本書畀徐立之簽名留念。八方同啲行家趁機問吓王賡武點睇大學合併，王校長話要社會上有共識先至得。
至於由七二年至八六年喺港大當校長嘅黃麗松，就笑自己係「大松」，唔特別記得「細松」梁錦松當年係點，冬冬又乖唔乖，佢話啲學生喺校內示威冇問題，出外面就要守法。
「大松」的確可自豪，當年佢嘅學生，𠵱家喺政府都做晒高官，佢重爆當年余叔韶借佢啲數學筆記抄，真好記性。
傳真︰2623-9278
電郵︰